काठमाडौ, २५ साउन २०८० । महिलाको चरित्र हत्या गरेको अभियोगमा दैलेख महाबु गाउँपालिका-२ घर भएका ३९ वर्षीय तुलाराम सारूलाई प्रहरीले पक्राउ गरेको छ ।
पसलमा सामान खरिद गर्ने क्रममा चिनजान भएकी महिलासंग फेसबुकमार्फत साथी भई उनले प्रेमको नाटक गरेको र विवाह गर्ने प्रलोभनमा पारी म्यासेन्जरमार्फत अश्लिल भिडियो तथा तस्बिरहरू रेकर्ड गरी चरित्र हत्या गरेको प्रहरीको भनाइ छ । पीडकले अश्लिल भिडियो तथा तस्बिरहरू रेकर्ड गरी दु:ख हैरानी दिनएको र प्रोफाइल ब्लक गरेपछि समेत नक्कली फेसबुक प्रोफाइलबाट पीडित महिलाको आफन्त तथा साथी भाइहरूलाई उनले सो अश्लिल भिडियो तथा तस्बिरहरू पठाएपछि पिडित महिला प्रहरीमा पुगेकी थिइन् ।
चरित्रहत्या गरेको खुल्न आएपछि साईबर व्यूरो भोटाहिटीबाट खटिएको प्रहरीले जिल्ला प्रहरी कार्यालय बाँकेको सहयोगमा उनलाई पक्राउ गरेको बताइएको छ । उनी उपर जिल्ला अदालत काठमाडौंबाट ५ दिन म्याद थप गरी आवश्यक अनुसन्धान भइरहेको साइबर ब्युरोले बताएको छ ।