महोत्तरी जिल्लाको बर्दिबास जलेश्वर सडकखण्डमा आइतबार साँझ बसको छतबाट खसेर एकको मृत्यु भएको छ । मृत्यु हुनेमा बसका सहचालक श्याम मण्डल रहेका छन् ।

४० वर्षीय मण्डल एकडारा गाउँपालिकाको बहेडाका भएका जिल्ला प्रहरी कार्यालय महोत्तरीले जनाएको छ ।

ना ४ख ५६४७ नम्बरको यात्रुबाहक बसको छतबाट खसेर उनको मृत्यु भएको हो । आइतबार साँझ बर्दिबासबाट जलेश्वर जाने क्रममा औरही नगरपालिका–८ टिम्कियामा बसको छतमा सामान हालेर तल झर्ने क्रममा उनी छतबाट सडकमा खसेका थिए । प्रहरीका अनुसार मण्डललाई उपचारको लागि जनकपुरमा लैजाँदै गर्दा करीब ७ बजेतिर उनको बाटैमा मृत्यु भएको थियो ।
बस र चालक इलाका प्रहरी कार्यालय रामगोपालपुरको नियन्त्रणमा रहेको र घटनाबारे थप अनुसन्धान भैरहेको जिल्ला प्रहरी कार्यालय महोत्तरीले जनाएको छ ।