दुई नम्बर प्रदेशमा शहीद परिवारलाई रोजगारी प्रदान गरिएको छ । मंगलवार तेस्रो मधेश आन्दोलनका प्रथम शहीद राजिव राउतकी पत्नी निलम देवी राउतलाई पनि प्रदेश सरकारले रोजगारी दिएको छ ।

प्रदेश मुख्य न्यायधिवक्ताको कार्यालयमा उनलाई नियुक्ति दिइएको हो । मुख्यमन्त्री मो.लालबाबु राउतले मंगलबार एक कार्यक्रमका बीच निलम देवीलाई नियुक्तिपत्र हस्तान्तरण गरे ।

पहिलो मन्त्रिपरिषद्को बैठकको निर्णयानुसार प्रदेश सरकारले उक्त रोजगारीको व्यवस्था गरेको जानकारी प्राप्त भएको छ । पहिलो मन्त्रिपरिषद्को बैठकले प्रत्येक शहीद परिवारलाई रोजगारी दिने निर्णय गरेको थियो ।

नियुक्ति पत्र हस्तान्तरण गर्दै मुख्यमन्त्रीले भने ” जति शहीद परिवार सम्पर्कमा आउनु हुन्छ, सबैलाई योग्यता र क्षमताको आधारमा रोजगारी दिन्छौं । ”

यसअघि सोही कार्यालयमा अर्को शहीद राम विवेक यादवकी श्रीमति अनिला यादवलाई समेत रोजगारी दिइएको छ । मुख्य न्यायधिवक्ता कार्यालयले हालसम्म २ जना शहीद परिवारलाई रोजगारी उपलब्ध गराएको हो ।