फोहोर व्यवस्थापनको विषयलाई लिएर तनावग्रस्त बनेको नुवाकोट र धादिङको सिमानामा पर्ने बञ्चरेडाँडास्थित ल्यान्डफिल साइटमा स्थलगत अध्ययनको लागि राष्ट्रिय मानव अधिकार आयोगको टोली पुगेको छ ।

‘स्थानीयको स्थिति के रहेछ ? फोहोर व्यवस्थापनमा अवरोध किन भएको हो भनेर हेर्न आयोगको टोली गएको छ,’ राष्ट्रिय मानव अधिकार आयोगका सचीव मुरारीप्रसाद खरेलले भने । स्थालगत अध्ययनपछि सबै पक्षलाई झिकाएर विवाद समाधानका लागि सुझव दिइने उनले बताए ।

‘टोलीको अध्ययनपछि आएको निष्कर्षको आधारमा सबै पक्षलाई झिकाएर छलफल गर्छौ,’ उनले भने । स्थानीयको अवरोधकाबीच प्रहरी परिचालन गरेर फोहोर व्यवस्थापन गर्न थालेपछि आयोगले चासो दिएको हो । केहीदिन यता बञ्चरेडाँडामा स्थानीयले फोहोर फाल्न नदिने भन्दै आन्दोलन गरिरहेका छन् ।