नेपालवाल संवाददाताकाठमाडौँ, ७ असोज
काठमाडौँ, ७ असोजइन्टरनेटमा यौनजन्य अश्लील साइट हेर्ने लत परेकालाई दुखको खबर छ । आइतवारदेखि इन्टरनेटमा अश्लील साइट नखुल्ने भएका छन् ।
देशमा बलात्कार लगायतका विभिन्न खालको अपराधको एक कारक रहेको निष्कर्ष निकाल्दै सरकारले अश्लील साइटमाथि प्रतिबन्ध लगाएको हो । अश्लील सामग्रीको आदानप्रदान, प्रकाशन र प्रशारणलाई सरकारले प्रतिबन्ध लगाएको छ ।
शुक्रबार सञ्चार तथा सूचना प्रविधि मन्त्रालयले अश्लील सामग्रीमा नेपाल भित्रबाट हुने पहुँच रोक्न दूरसञ्चार प्राधिकरणलाई निर्देशन दिएलगत्तै प्राधिकरणले पनि सम्बन्धित इन्टरनेट सेवा प्रदायकहरूलाई आइतबारबाटै रोक्न निर्देशन दिएको जानकारी प्राप्त भएको छ ।
यौनजन्य अश्लील सामग्रीहरुको आदानप्रदान, प्रकाशन र प्रसारणलाई मुलुकी अपराध (संहिता) ऐन, २०७४ को दफा १२१ तथा अन्य प्रचलित कानुनले पनि बन्देज लगाएको छ ।