भक्तपुर, २७ साउन २०८२भक्तपुर । भक्तपुर-१, सल्लाघारी स्थित हनुमन्ते खोलामा शव फेला परेको छ । दिउँसो करिब साढे १ बजेको समयमा शव फेला परेको हो ।
जिल्ला प्रहरी परिसर भक्तपुरबाट प्रहरी निरीक्षक दत्ताराम अधिकारीको कमान्डमा खटिएको प्रहरीले घटनास्थलको मुचुल्का तयार पारी करिब ३ बजेको समयमा शवलाई पोस्टमार्टमका लागि दुवाकोट स्थित काठमाडौं मेडिकल कलेज अस्पतालमा पठाइएको जिल्ला प्रहरी परिसर भक्तपुरले जनाएको छ ।
मृतक व्यक्तिको साथबाट भेटिएको परिचय पत्रको आधारमा उनी दिपक कुमार खड्का भएको अनुसन्धानमा संलग्न एक प्रहरीले जानकारी दिए ।
नेपाली सेना जगदल गण छाउनीमा हवल्दार पदमा कार्यरत दिपक अन्दाजी ४० वर्ष उमेरका छन् । उनी नेपाली सेनाको ट्याक्सुटमै मृत अवस्थामा फेला परेका हुन् ।
उनी रामेछाप स्थायी घर भई चाँगुनारायण(३ झौखेलमा बसोबास गर्दै आएका खुलेको छ ।
घटनाबारे थप अनुसन्धान भैरहेको जिल्ला प्रहरी परिसर भक्तपुरका प्रहरी उपरीक्षक माधव बुढाथोकीले बताएका छन् ।