काठमाडौं, ३२ साउनसत्तारुढ दल नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले स्वास्थ्य क्षेत्र पुँजीपतिको हातमा परेकोमा चिन्ता व्यक्त गरेका छन् । विश्वमै स्वास्थ्य क्षेत्र पूँजीपतिले चलाएको भन्दै उनले चिन्ता व्यक्त गरेका हुन् ।
शनिवार राष्ट्रिय चिकित्सक संघ नेपालले राजधानीमा गरेको एक अन्तरक्रिया कार्यक्रममा बोल्दै अध्यक्ष प्रचण्डले भने, ”स्वास्थ्य क्षेत्रलाई समाजवाद उन्मुख गराउने चुनौति देखिएको छ।” संबिधानमा समाजबाद उन्मुख लेखिएपनि स्वास्थ्य क्षेत्रमा त्यो लागू गर्न चुनौती भएको उनको बनाइ छ ।
अध्यक्ष प्रचण्डले कम्युनिस्ट पार्टीको नेतृत्वमा पूर्ण बहुमतको सरकार हुँदा पनि केही गर्न नसकिए अब यस्तो अवसर बारम्बार नआउने बताए । सरकारका कामलाई योजनामा व्यवस्थित र प्रभावकारी बनाएर पूरा गर्नु पर्नेमा उनले जोड दिए ।
”कम्युनिष्ट पार्टीका लागि यो बेला अवसर र चुनौति दुबै देखिएको छ, अहिले केही गर्न नसकिए इतिहासले धिकार्ने छ ।” उनले भने ।
फरक प्रसंगमा प्रचण्डले पार्टी एकताका लागि भनेर आफूले धेरै चित्त नबुझेका कुरामा पनि निर्णय लिनुपर्ने बाध्यतामा परेको गुनासो गरे ।
कार्यक्रममा नेकपाका महासचिव विष्णु पौडेलले स्वास्थ्य सेवा सर्वसुलभ हुनु पर्नेमा बताए भने सहभागी चिकित्सकहरुले सुरक्षित पेशा बिना गुणस्तरीय स्वास्थ्य सेवा सम्भव नभएको जिकिर गरेका थिए ।