नवलपरासीको गौंडाकोट -१४ , बर्दघाट–सुस्ता पूर्व रजहरबाट बेपत्ता बनेका बेहुलाको अझै पत्तो लागेको छैन । बिहेको अघिल्लो रात नै बेहुला हराएपछि बेहुली पट्टि त पीर पर्ने नै भयो, घरका मानिसहरुमा पनि रुवाबासी छाएको छ ।

बिहेका सबै काम सकीसकेको थियो । आफन्तहरुले घर खचाखच भरिएको थियो । भोलीको बिहे सबै आ-आफ्नै सुरमा थिए । राती संगै कुरा गरेर सुत्न गएका बेहुला बिहेको दिन भने बेपत्ता भए ।

माघ २३ गते बिहे तय भएका उनी माघ २२ गते राती नै बेपत्ता भएका हुन् ।

बेहुला २८ बर्षीय बालकृष्ण खरेल बैदेशिक रोजगारीमा थिए । स्पेनबाट बिहे गर्ने सपना सजाएर २ महिना अघि आएका उनको गाउँकै एउटी युवतीसंग बिहे छिनिएको थियो । अघिल्लो बेलुकासम्म परिवारका सदस्यसँग हाँसीखुसी व्यवहार गरिरहेका बालकृष्ण एकाएक मध्यरातमा बेपत्ता बनेपछि परिवारको खुशी खोसिएको छ ।

गत माघ २२ गते मध्यरात पछि उनलाई कसैले देखेका छैनन् । १२ बजेपछि आफ्नै घरबाट बेपत्ता भएका खरेलको अवस्था एक साता बितिसक्दा पनि अज्ञात हुँदा पुरै गाँउबासी नै परेशान बनेका छन ।

बेपत्ता भएका बालकृष्णको कसैसँग रिसराग र झैझगडा समेत नभएको पारिवारिक स्रोत बताउँछ ।

बेपत्ता बालकृष्णको खोजीका लागि उनका आफन्त, साथीभाई र अमरापुरीका स्थानीयवासीले स्थानीय प्रशासनसहित सबैलाई अपिल गरेका छन् ।