डा.गोबिन्द केसीको आन्दोलनलाई समर्थन गर्दै नेपाल चिकित्सक संघले बिहीबारका लागि आह्वान गरेको देशब्यापी स्वास्थ्य संस्था बन्द कार्यक्रमको काउन्टरमा निजी मेडिकल र डेन्टल कलेजहरुको छाता संगठन एशोसिएसन अफ प्राईभेट मेडिकल एण्ड डेन्टल कलेज अफ नेपालले बिपक्षमा उभिने बताएको छ ।  एशोसिएसनले आज एक बिज्ञप्ती जारी गर्दै यस्तो घोषणा गरेको हो ।

बुधबार प्रेस बिज्ञप्ती जारी गरेर स्वास्थ्य संस्था बन्दको प्रतिकारमा उत्रने एशोसिएसनले चेतावनी दिएको छ । एशोसिएसनका महासचिवद्वारा जारी बिज्ञप्तीमा स्वास्थ्य संस्था जस्तो संवेदनसिल क्षेत्रमा गर्न लागिएको बन्दलाई डटेर अवज्ञा गर्न आह्वान गरिएको छ । लाखौं बिरामीहरुको जीवन रक्षाका लागि चिकित्सकहरुलाई आ–आफ्नो कार्यक्षेत्रमा निष्ठापूर्वक लागेर आफ्नो कर्तब्य निर्वाह गर्न बिज्ञप्तीमार्फत अपिल गरिएको हो ।

समस्याको समाधान वार्ताको माध्यमबाट हुने लोकतान्त्रिक बिधि बिपरीत ‘मेरो गोरुको बाह्रै टक्का’ जस्तो गर्नु गलत भएको एशोसिएसनको ठम्याई छ । सर्वोच्चको फैसलालाई हरेक नागरिकले सम्मान गर्नुपर्छ । बिरामीहरुको स्वास्थ्यको ख्याल नगरी बिभिन्न बाहनामा वारम्वार अस्पतालहरु बन्द गर्ने परिपाटीले कसैको भलो नगर्ने बिज्ञप्तीमा उल्लेख छ ।

३ बर्षअघि प्रस्तुत माथेमा आयोगको प्रतिवेदन जस्ताको तस्तै लागू गर्न खोज्नु ब्यवहारिक तथा न्याय संगत नहुँने एशोसिएसनको ठहर छ ।

चिकित्सा शिक्षा बिधेयकको बिषयमा बिज्ञहरु र सरोकारवालाहरुको राय लिई सार्वभौम संसदमानै छलफल गरी लोकतान्त्रिक बिधि र प्रकृयाबाट टुंग्याउँनु नै अहिलेको समस्या समाधानको उत्तम बिकल्प रहेको बिज्ञप्तीमा उल्लेख गरिएको छ ।

चिकित्सक संघ जस्तो जिम्मेवार निकायले मध्यस्थताको भूमिका निर्वाह गर्नुको साटो स्वास्थ्य सस्था जस्तो संवेदनसिल क्षेत्रमा बन्द आवहन गर्नु गलत भएको एशोसिएसनको निष्कर्ष छ । चिकित्सक संघले बिहिबार देशभरका स्वास्थ्य संस्थामा आकस्मिक बाहेकका सम्पूर्ण सेवा बन्द गर्ने घोषणा गरेपछि एशोसियसन त्यसको बिपक्षमा उत्रिएको हो ।

अध्यादेशको रुपमा संसदमा प्रस्तुत भएको चिकित्सा शिक्षा बिधेयक हुवहु पारित गर्नुपर्ने माग राख्दै डा.केसी जुम्लाको कर्णाली स्वास्थ्य बिज्ञान प्रतिष्ठानमा अनसन बसिरहेका छन् । उक्त अनसनको पक्ष र बिपक्षमा चिकित्साकर्मी मात्र नभइ बुद्धिजीविहरु समेत खुलेरै प्रस्तुत  भईरहेका छन् । यसैबीच एशोसियसनले घोषणा गरेको प्रतिरोधले परिस्थिति पेचिलो बन्ने देखिएको छ ।