काठमाडौं, ३ साउनचिकित्सा शिक्षा बिधेयक फिर्ता हुनुपर्ने भन्दै बीस दिनदेखि जुम्लामा अनसनरत प्रा डा गोविन्द केसीलाई काठमाडौँ ल्याइएको छ । स्वास्थ्यमा समस्या देखिएको दावी गर्दै सरकारले सदरमुकामस्थित कर्णाली स्वास्थ्य विज्ञान प्रतिष्ठानमा अनशनरत केसीलाई आज साँझ काठमाडौँ ल्याएको हो ।
नेपाली सेनाको हेलिकोप्टरबाट साँझ ६ः४५ मा काठमाडौँ अवतरण गराइएका डा केसीलाई त्रिवि शिक्षण अस्पताल महाराजगन्जमा राखिएको छ ।
उनलाई ल्याउन गएको टोलीलाई उनका समर्थकहरुले अवरोध पुर्याएका थिए । प्रहरीले डा केसीका समर्थकहरुमाथि बल प्रयोग गरेको थियो । दिनभर जुम्लामा गोली चलेको कुराले माहोल तात्तिएको थियो । प्रहरीकै गोली लागि एक प्रहरी जवानको ज्यान गएको हल्ला समेत खुबै चल्यो ।
गृह मन्त्रालयले भने गोली नचलेको र ज्यान नगएको बताएको छ । प्रहरी ज्यादै संयमित भएर व्यवहार गरेको तर केसी समर्थकले नियोजित रुपमा सिसाका टुक्रा लगायतले प्रहार गर्दा प्रहरी जवान कमल उपाध्याय गम्भीर घाइते भएको र उनको उपचार भैरहेको भनिएको छ ।
डा केसीलाई काठमाडौँ ल्याउन प्रहरीले नै प्रहरीको हत्याको झुटो खबर फैलाएर भीड तितर बितर गर्न सफल भएको एक स्थानीयले दावी गरे । प्रहरी प्रधान कार्यालयले भने एक विज्ञप्ती निकाल्दै संचार माध्यमहरुले समाचार ब्रेेक गर्ने बहानामा मानवीय संवेदनामाथि खेलवाड गरेको र मृत्युको हल्ला मच्चाएको भन्दै खेद प्रकट गरेको छ ।