काठमाडौंको कपनमा केटाहरुको ग्याङ फाइटमा परि एक युवकले ज्यान गुमाएका छन् । मृत्यु हुनेमा खोटाङका १८ वर्षिय सञ्जय राई रहेका छन् ।

प्रहरीका अनुसार ग्याङ फाइटमा परि गम्भीर घाइते भएका राईको मंगलबार राति ज्यान गएको हो । उनको महाराजगन्जस्थित टिचिङ अस्पतालमा उपचारका क्रममा मृत्यु भएको महानगरीय प्रहरी परिसर टेकुका सूचना अधिकारी समेत रहेका डिएसपी होबिन्द्र बोगटीले बताए ।

मंगलवार राती अन्दाजी ९ बजेको समयमा युवाहरुबीच ग्याङ फाइट भएको बताइएको छ । प्रहरीका अनुसार ग्याङ फाइटमा संलग्न २ युवालाई बुधबार बिहान पक्राउ गरिएको छ । ज्यानै लिने गरी झगडा भएको विषय के थियो भन्ने बारे प्रहरीले केहि बताएको छैन । घटनाको आवश्यक अनुसन्धान भैरहेको प्रहरीको भनाइ छ ।