भक्तपुर, २१ कात्तिकमंसिर १४ गतेको लागि निर्धारित उपनिर्वाचनका लागि आज उम्मेदवारी दर्ता गर्ने दिन तोकिएकोले उम्मेदवारी दर्ताको लागि उम्मेदवारहरु तयार देखिएका छन् ।
निर्वाचन आयोगले सार्वजनिक गरेको कार्यतालिका अनुसार प्रतिनिधिसभा र प्रदेश सभा सदस्यका लागि बिहीबार उम्मेदवारी दर्ता हुँदैछ ।
भक्तपुरको निर्वाचन क्षेत्र नम्बर १ को प्रदेश क्षेत्र नम्बर १ मा हुने प्रदेश सभा सदस्यको लागि उम्मेदवारले आज बिहान १० बजेदेखि दिउँसो १ बजेसम्म मूख्य निर्वाचन अधिकृतको कार्यालयमा मनोनयनपत्र दर्ता गराउने समय सिमा तोकिएको छ ।
सत्तारुढ दल नेपाल कम्युनिष्ट पार्टी(नेकपा) का उम्मेदवार डीपी ढकालले १०:३० बजे कमलबिनायकको भत्केको पाटीबाट र्यालीसहित मूख्य निर्वाचन अधिकृतको कार्यालयमा पुगी उम्मेद्वारी दर्ता गर्ने कार्यक्रम तय भएको नेकपाले जनाएको छ ।
प्रमुख प्रतिपक्षी दल नेपाली काँग्रेसको तर्फबाट कृष्णलाल भंडेलले ११ बजे कमलबिनायकबाट र्याली सहित उम्मेद्वारी दर्ता गर्ने बताइएको छ ।
त्यसैगरी नेपाल मजदुर किसान पार्टीका तर्फबाट ११ बजे भत्केको पार्टीमा भेला भै उम्मेदवारले र्याली सहित उम्मेद्वारी दर्ता गर्ने कार्यक्रम रहेको नेमकिपाले जनाएको छ । समाचार तयार पार्दासम्म उम्मेदवारको अन्तिम टुंगो लगाउन पार्टी केन्द्रिय कमिटीको बैठक बसिरहेको जानकारी प्राप्त भएको छ ।
उम्मेद्वारी दर्ता गर्ने दिन भएकोले कमलविनायक क्षेत्रमा यतिबेला राजनीतिक दलका नेताकार्यकर्ताको चहलपहल बढेको छ ।
भक्तपुरमा हुने उप निर्वाचनको लागि निर्वाचन आयोगले भक्तपुर जिल्ला अदालतका न्यायाधिस जगत नारायण प्रधानलाई मूख्य निर्वाचन अधिकृतको रुपमा नियुक्त गरेको छ । जिल्लामा कार्यरत ५ न्यायाधिस मध्ये प्रधान आयोगको मूख्य निर्वाचन अधिकृत छनौट भएका हुन् । उनी जिल्ला अदालतका बरिष्ठ न्यायाधिस हुन् ।