भक्तपुर, १० मङ्सिरनेपाल कम्युनिष्ट पार्टी (नेकपा)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले प्रदेश नं– ३ को राजधानी र नामाङ्कनको विषय छिटो टुङ्ग्याउन मुख्यमन्त्री डोरमणि पौडेललाई आग्रह गरेका छन् ।
अध्यक्ष दाहालले अब धेरै समय यस विषयमा अड्केर बस्ने नहुने कुरालाई उल्लेख गर्दै राजधानी र नामको विषय सकेर विकास निर्माणमा केन्द्रित हुनुपर्ने बताए ।
वर्तमान सरकारलाई विकास निर्माण गरेर आमूल परिवर्तन गर्ने अवसर जुरेको र नयाँ संरचाना बनाउने क्रममा आएका जटिलताका विषयहरु चुनौतीपूर्ण रहेको अध्यक्ष दाहालको भनाइ छ ।
उनले कतिपय कानुन बनिसकेको र कतिपय बन्न बाँकी रहेको बताए। अब विकास निर्माणले छलाङ मार्ने बताउँदै अन्तर्राष्ट्रिय एजेन्सीले नेपालमा भई रहेको विकासको गति सन्तोषजनक रहेको समेत बताएका छन् ।
उपनिर्वाचनमा नेकपाप्रति जनता उत्साहित रहेको उल्लेख गर्दै उहाँले अब पार्टी र सङ्गठनमा अली बढी जोडबल दिने निर्णय गरेका थिए । उनको निर्णयानुसार उपनिर्वाचनको स्थानमा पुग्दा त्यहाँका जनता चुनाव र पार्टीप्रति सकारात्मक रहेकाले परिणाम फेरि नेकपाकै पक्षमा हुने विश्वास व्यक्त गरे ।