भक्तपुर, १६ मङ्सिरराष्ट्रिय प्रजातन्त्र पार्टी (संयुक्त) का अध्यक्ष पशुपति शमशेर जबराले उपनिर्वाचनमा जनताले सरकार विरुद्ध मतदान गरेको बताएका छन् । प्राप्त परीणाम सरकारविरुद्धको जनमत भएको उनको भनाइ छ ।
सोमबार रिपोर्टर्स क्लब नेपाल, काठमाडौंद्वारा आयोजित साक्षात्कार कार्यक्रममा बोल्दै जबराले भक्तपुर र धरानमा दुई महत्वपूर्ण सिट नेकपाले हारेको बताउदै धरान र भक्तपुरमा सरकारविरुद्ध जनमत आएको जिकिर गरे ।
सरकारले दुई तिहाई बहुमतको अवसरलाई खेर फालेको आरोप लगाउदै उनले भने,‘यो सरकार बनेको झण्डै दुई वर्ष भयो । सरकार विकास र प्रशासनिक रुपमा पुरै असफल भयो ।” सरकारको असफलताको रुपमा नेकपाको हार लाई जोडेर हेर्नुपर्नेमा अध्यक्ष जवराको जोड छ ।
भक्तपुरको प्रदेश सभा सदस्यको लागि भएको उपनिर्वाचनमा राप्रपा (संयुक्त)ले नेपाली काँग्रेसलाई सघाएको थियो । यस अघि नेकपा निर्वाचित यस क्षेत्रबाट काँग्रेसले जीत हात पारेको छ ।
उक्त साक्षात्कार कार्यक्रममा नेकपाका प्रदेश नम्बर ३ का सचिव एवं पूर्व मन्त्री आनन्द पोखरेलले नेकपा एकढिक्का भएर निर्वाचनमा होमिएको भएपनि भक्तपुरमा राप्रपा (संयुक्त) लगायत साना दलले काँग्रेस लाई सघाउदा जित निकाल्न नसकिएको जिकिर गर्दै नेकपा कमजोर भएको नभई काँग्रेस लगायतका दलको गठबन्धनका कारण हार व्यहोर्न बाध्य भएको भनेका थिए ।