बर्दीबास, ३ माघ शिक्षा, विज्ञान तथा प्रविधि मन्त्री गिरिराजमणी पोखरेलले सामुदायिक विद्यालयमा शिक्षक अभावलाई मध्यनजर गर्दै सरकारले दरवन्दी थप गर्न खोजेको खुलासा गरेका छन् । शिक्षण सिकाई अनुदान र स्वयम् सेवक शिक्षक पठाउने कार्यक्रम तयार गरिरहेको उनले खुलासा गरेका हुन् ।
शुक्रवार गृहनगर महोत्तरीको बर्दीवास पुगेर मन्त्री पोखरेलले विद्यालयहरु मर्ज गर्नुपर्ने समेत बताए ।
बर्दीवास नगरपालिकाद्वारा आयोजित “बर्दीवास शिक्षा सम्मेलन” लाई शुक्रवार सम्बोधन गर्दै मन्त्री पोखरेलले सार्वजनिक विद्यालयको सवलिकरणको लागि शिक्षालाई गुणस्तरीय बनाउन र द्यालयको गुज्रिदै गरेको समस्यालाई सम्बोधन गर्न विद्यालय मर्जर अहिलेको आवश्यकता बनेको बताए । विद्यालयहरु धेरै खुलेका कारण व्यवस्थापनमा चुनौती भएको भन्दै उनले मर्जरको आवश्यकता औल्याएका हुन् ।
अहिले सरकारले प्राविधिक र व्यवसायिक शिक्षालाई जोड दिएको बताउदै उनले प्राविधिक र व्यवसायिक शिक्षाले देश विकासमा कायापलट हुने विस्वास व्यक्त गरे ।
बर्दीबासको जस्तो शिक्षा सम्मेलन सबै स्थानीय तहमा गर्नु जरुरी रहेकोमा जोड दिदै मन्त्री पोखरेलले सार्वजनिक विद्यालयको सवलीकरणको लागि दशकीय अभियान शुरु गरेको जानकारी गराउदै अभियानमा सबैको साथ र सहयोगको लागि पनि अपिल गरेका थिए ।
कार्यक्रममा बर्दीवास नगरपालिकाका प्रमुख विदुर कुमार कार्कीले बर्दीवासलाई यस क्षेत्रकै शैक्षिक गन्तब्य बनाउन नगरपालिकाले काम गरिरहेको र सार्वजनिक विद्यालयको सवलीकरण आफ्नो पहिलो प्राथमिकतामा रहेको प्रष्ट पारेका थिए ।