झापामा विद्यावारिधि (पिएचडी) अध्ययन गर्ने दुई विद्यार्थीले रु ५० हजारका दरले छात्रवृत्ति पाएका छन् । झापाको मेचीनगर नगरपालिकाले नगरक्षेत्रका दुई विद्यार्थीलाई सो छात्रवृत्ति दिएको हो ।

छात्रवृत्ति पाउनेमा मेचीनगर–११ का विष्णु रिमालले राजनीतिशास्त्रमा र मेचीनगर–९ का सम्पर्कबाबु सिलवालले जलविज्ञानसम्बन्धी विषयमा विद्यावारिधि गर्दैछन् ।

नगरपालिकाका उपप्रमुख मीना उप्रेतीले मेचीनगर नगरपालिकाले माध्यमिक तहसम्मको शिक्षामा विपन्न, जेहेन्दार र दलित विद्यार्थीलाई यसअघिदेखि नै छात्रवृत्ति प्रदान गर्दै आए तापनि विद्यावारिधि तहमा पहिलोपटक प्रोत्साहनस्वरुप छात्रवृत्ति प्रदान गरेको जानकारी दिए ।

नगरपालिकाले झापा विद्रोहका शहीद वीरेन राजवंशीको स्मृतिमा प्रत्येक वर्ष कूल रु १० लाखको विपन्न तथा दलित छात्रवृत्ति वितरण गर्दै आएको छ । सो छात्रवृत्ति गत आर्थिक वर्षमा प्राविधिक विषयमा अध्ययनरत ४७८ जनालाई वितरण गरिएको नगर शिक्षा शाखाका प्रमुख होमनाथ भण्डारीले बताए ।

उनका अनुसार कक्षा ११ र १२ मा पशु तथा कृषि विज्ञान पढ्ने विद्यार्थीलाई गैरदलित भए रु दुई हजार ५०० र दलित भए रु तीन हजारका दरले वार्षिक छात्रवृत्ति वितरण गरिएको छ । नगरपालिकाले प्राविधिक विषयमा स्नातक र स्नातकोत्तर गरेका विद्यार्थीलाई रु पाँच हजारका दरले रकम प्रदान गरेको उनको भनाई छ ।