२७ माघ २०७६काठमाडौ । स्वास्थ्य तथा जनसंख्या मन्त्रालयले चीनबाट नेपाल ल्याइने विद्यार्थीको निगरानीका लागि ६० स्वास्थ्यकर्मी परिचालन गर्ने भएको छ । ६० जना स्वास्थ्यकर्मीलाई तयारी अवस्थामा राख्न निर्देशन दिइसकेको मन्त्रालयका प्रवक्ता सागर दाहालले जानकारी दिएका छन् ।
क्वारेन्टाइनमा राखिने नेपालीको स्वास्थ्य निगरानीमा खटिने ६० जना चिकित्सकलाई स्वास्थ्य मन्त्रालयले आज (सोमबार) अभिमुखीकरण तालिम समेत दिंदैछ ।
तालिममा क्वारेन्टाइनमा कसरी राखिने, स्वास्थ्यकर्मीले कसरी काम गर्ने र शंकास्पद अवस्था आएको खण्डमा के गर्ने भनेर सिकाउने उनले जानकारी दिएका छन् । तालिम आज २ बजे इपीडीयोलोजी तथा रोग नियण्त्रण महाशाखा टेकुमा हुँदैछ ।
निगरानीमा खटिने ६० जना स्वासथ्यकर्मी फरक–फरक अस्पतालमा कार्यरत रहेको शुक्रराज ट्रपिकल तथा सरवा रोग केन्द्रका प्रवक्ता डाक्टर अनुप बास्तोलाले जानकारी दिएका छन् ।
मन्त्रालयले छुट्याएको ६० जनामा मेडिकल अफिसर, स्टाफ नर्स, हेल्थ असिस्टेन्ट, पारामेडिक्स लगायतका स्वास्थ्यकर्मी छन् ।
चीनमा विद्यार्थी लिन कहिले जाने भन्ने टुंगो भने आजको मन्त्रिपरिषदको बैठकले निर्णय गर्ने मन्त्रालयका प्रवक्ता दाहालले बताए । चीनको वुहानमा रहेका १८० जना विद्यार्थीलाई सरकारले नेपाल ल्याउने तयारी गरेको छ । गत बिहीबारको मन्त्रिपरिषदको बैठकले भक्तपुरको खरीपाटीमा क्वारेण्टाइनमा राख्ने निर्णय गरेको थियो ।