भक्तपुर, ३ फागुन नेपाल सरकारले चीनमा रहेका आफ्ना नागरिक उद्धार गर्न पठाएको नेपाल वायु सेवा निगमको जहाज चीनको वुहानबाट १ सय ७५ जना नेपाली बोकेर नेपालतर्फ उडेको छ ।
शनिवार साँझ ४ बजे उडेर ८ बजे वुहानमा अवतरण गरेको विमान अहिले राति ११ बजे नेपालतर्फ उडेको हो । बिहान ३ बजे काठमाडौको त्रिभुवन विमानस्थल ओर्लिएपछि उनीहरुलाई सोझै क्वारेन्टाइनमा ल्याइने बताइएको छ । आइतवार बिहान ४ बजे भित्र नै उनीहरुलाई क्वारेन्टाइनमा प्रवेश गराइसक्ने गरि शुक्रवार नै अभ्यास गरिसकिएको छ ।
घर फर्किन चाहेका १८५ मध्ये ४ फर्कन नमानेका ६ जनामा शरीरको तापक्रम बढी देखिएपछि फर्कन नपाएका कारण १७५ जना आफ्ना नागरिक लिएर निगमको एयरबस ३३३० अन्नपूर्ण काठमाडौंका लागि उडेको हो।
फर्किएका १७५ जना जनालाई भक्तपुरको खरिपाटीस्थित क्वारेन्टाइनमा पुर्याइने छ । नेपाल विद्युत् प्राधिकरणको तालिम केन्द्रमा बनाइएको क्वारेन्टाइनमा उनीहरु सबैलाई राखिने गरि सम्पूर्ण व्यवस्थापन गरिसकिएको छ । उनीहरु १५ दिनसम्म त्यहिँ निगरानीमा रहने तय भएको हो ।
निगमको विमानका ‘क्याबिन क्रू’ लाई पनि १५ दिन नै क्वारेन्टाइनमा राखिनेछ। उनीहरुको लागि भने नगरकोटस्थित खानेपानी तालिम केन्द्र लाई अर्को क्वारेन्टाइन स्थल कायम गरिएको छ ।