१२ फागुन २०७६ काठमाडौं । संघीय संसदको माथिल्लो सदन (राष्ट्रिय सभा)का सदस्य पनि प्रधानमन्त्री बन्न पाउने गरी संविधान संशोधन गर्न भनेर अध्ययनका लागि गठन गरिएको भनिएको कार्यदलमा बस्न नेकपाका २ जना नेताले अस्वीकार गरेका छन् ।
नेकपा सचिवालय बैठकले संविधान संशोधन गर्न भनेर वरिष्ठ नेता माधव कुमार नेपालको संयोजकत्वमा ३ सदस्यीय कार्यदल गठन गर्ने निर्णय गरेको विषय सार्वजनिक भएको थियो । नेकपा नेताहरुले औपचारिक रुपमा कार्यदल गठन भएको अस्वीकार गर्दै आए पनि संयोजक भनिएका नेता नेपालले भने सोमबार कार्यदलको बैठक बोलाएका थिए ।
नेता नेपालले सोमबार आफ्नो निजी निवासमा कार्यदलका सदस्य सुवास नेम्वाङ र खिमलाल देवकोटालाई बोलाएका थिए । तर, नेम्वाङ र देवकोटाले भने नेपाललाई भेटेर आफूहरु कार्यदलमा बस्न नसक्ने बताएका छन् ।
नेकपाले उपाध्यक्ष बामदेव गौतमको चाहनाअनुसार राष्ट्रिय सभा सदस्य पनि प्रधानमन्त्री बन्न पाउने गरी संविधान संशोधनका लागि अध्ययन कार्यदल बनाएको थियो ।