हेटौडा, २२ फागुन कोरोना भाइरस (कोभिड- १९) को जोखिमबाट बच्ने उपायको रुपमा बागमती प्रदेश सरकारले हात नमिलाउने निर्णय गरेको छ। बिहीबार मुख्यमन्त्री डोरमणि पौडेलको अध्यक्षतामा बसेको प्रदेश मन्त्रिपरिषद बैठकले यस्तो निर्णय नै गरेको हो।
विश्व स्वास्थ्य संगठनले नेपाल कोभिड- १९ काे उच्च जोखिममा रहेको सार्वजनिक गरेपछि संघीय सरकारले सभा भेला नगर्न र अत्यावस्यक काम बाहेक भिडभाडमा समेत नहिड्न सार्वजनिक अपिल नै गरिसकेको छ ।
बागमती प्रदेश सरकारले पनि कोरोना भाइरस बिरुद्ध बिभिन्न जनचेतनामूलक कार्यक्रम गरिरहेकाे सामाजिक विकाश मन्त्री युवराज दुलालले जानकारी दिए । छुट्टै उपचार कक्ष समेत निर्माण गरिसकिएको उनको भनाइ छ ।
”हात मिलाउदा रोग सर्ने चिकित्सकीय भनाइलाई मध्यनजर गर्दै हात नमिलाउने निर्णय गरिएको हो । साथै सम्पूर्ण जनसमुदायलाई पनि परम्परागत नमस्कार नै गर्न अनुरोध गर्ने निर्णय गरिएको छ ।” सामाजिक विकाश मन्त्री युवराज दुलालले भने । बैठकले प्रधानमन्त्री केपी शर्मा ओलीको शीघ्र पूर्ण स्वास्थ्यलाभको कामना गर्दै उपचारमा संलग्न चिकित्सकको टोलीलाई धन्यवाद दिने समेत निर्णय गरेको बताइएको छ ।