रुपन्देहीको क्रिमशन अस्पतालमा उपचाररत गुल्मीका कोरोना संक्रमित शिक्षकको मृत्यु भएको छ । सरकारले उनको मृत्यु भएको पुष्टि गरेको हो ।

स्वास्थ्य मन्त्रालयका प्रवक्ता डा. विकास देवकोटाले उनको मृत्यु भएको जानकारी गराए । मन्त्रालयका प्रवक्ता डा. देवकोटाका अनुसार उनको मृत्यु बिहीबार विहान भएको हो ।
यस अघि प्रदेश ५ को सामाजिक विकास मन्त्री सुदर्शन बरालले संक्रमित बिरामीको मृत्यु भएको सार्वजनिक गरेका थिए ।

बरालले मृतकप्रति हार्दिक श्रद्धाञ्जली व्यक्त गर्दै बचाउन अनेकौं प्रयास गर्दापनि बचाउन नसकिएको भन्दै यसले आफुलाई दुखी बनाएको बताएका छन् ।

मृतक शिक्षक गुल्मी मदाने गाउँपालिका वडा नं ६ का स्थायी बासिन्दा हुन् । ४१ बर्षका उनी बिरामी भएपछी यहि जेठ १ गते क्रिमशन अस्पतालमा भर्ना भएका थिए । उनको स्वाब परिक्षणमा कोरोना पोजेटिभ देखिएको थियो । उनि गाउँकै विद्यालयका प्रधानाध्यापक हुन् ।

यस संगै कोरोना संक्रमणका कारण ज्यान गुमाउनेको संख्या ३ पुगेको छ । यस अघि सिन्धुपाल्चोककी २९ वर्षिया सुत्केरी महिला र बाँकेका २५ वर्षीय संक्रमित पुरुषको मृत्यु भएको थियो ।