२६ असार २०७७पोखरा । अविरल वर्षाका कारण गएको पहिरोमा परी पोखरा महानगर पालिकामा छ जनाको मृत्यु भएको छ । सात जना घाइते भएको जिल्ला प्रहरी कार्यालय, कास्कीका डीएसपी सुवास हमालले जानकारी दिए ।
राति करिब पौने ३ बजेको समयमा पोखरा महानगरपालिका–१८, सराङकोट गोठादीस्थित टङ्कबहादुर थापाको घर पहिरामा पर्दा घरमा सुतेकामध्ये पाँच जनाको मृत्यु भएको छ । उनीहरूको शव सङ्कलन भइसकेको डीएसपी हमालले बताए ।
अन्य सात जना घाइते छन् । उनीहरूको उद्धार गरी उपचारका लागि मणिपाल शिक्षण अस्पताल र पश्चिमाञ्चल अस्पतालमा लगिएको छ । बिहीबार थापाको घरमा जन्मदिन मनाउन जम्मा भएका उनीहरू राति सुतेको बेला घरमाथिबाट खसेको पहिरोले पुरेको थियो ।
त्यसैगरी, पोखरा महानगरपालिका–२५, हेम्जामा रामचन्द्र अधिकारीको घर पहिरोमा पुरिँदा अधिकारीकी आमा ७० वर्षीया भीमकली अधिकारीको घटनास्थलमै मृत्यु भएको प्रहरीले जनाएको छ ।