सरकारी रकम आफन्तको नाममा जम्मा गरेको अभियोगमा एकजना लेखापालसहित उनका नातागोताका ४ जना पक्राउ परेका छन् । पक्राउ पर्नेमा पश्चिम रुकुमको त्रिवेणी गाउँपालिकाका लेखापाल हेमन्त केसी, सह-लेखापाल समेत रहेका उनका भतिज सुवास केसी, स्थायी शिक्षक समेत रहेका उनका भाइ विकास केसी र उनका भतिज भिमसेन केसी रहेका छन् ।

उनीहरुलाई राती ९ बजे गाउँपालिकाको कार्यालयबाट गिरफ्तार गरिएको रुकुम पश्चिमका प्रमुख जिल्ला अधिकारी उपेन्द्रराज पौड्यालले पुष्टि गरे । आफूविरुद्धका प्रमाण नष्ट गर्न राति ९ बजे कार्यालयमा पुगेका उनीहरुलाई स्थानीयको सूचना पछि प्रहरीले पक्राउ गरेको हो । स्थानीय प्रहरीले उनीहरुलाई सदरमुकाम स्थित जिल्ला प्रहरी कार्यालय पुर्याई अनुसन्धान गरिरहेको बताइएको छ ।

गाउँपालिकाको करिब पच्चीस लाख रुपैया उनीहरुले मिलेमतोमा लेखापाल हेमन्त, उनकी श्रीमती बिरमा र भतिज सुवासको नाममा राखेको अभियोग लागेको छ ।