भक्तपुर, २६ असोजसर्वोच्च अदालत बार एशोसिएशनको सोमबार सम्पन्न पूर्ण बैठकले आगामी नयाँ कार्यसमितिको निर्वाचनको लागि ३ सदस्यीय निर्वाचन समिति बनाएको छ । वर्तमान कार्यसमितिका उपाध्यक्ष अधिवक्ता राजु खडकाको संयोजकत्वमा ३ सदस्यीय निर्वाचन समिति बनाइएकाे हाे ।
निर्वाचन समितिमा संयोजक अधिवक्ता राजु खडकाका अलावा सदस्यहरुमा अधिवक्ता भुवनप्रसाद वाग्ले र अधिवक्ता मुरारीप्रसाद सापकोटा रहेका छन् । नवगठित निर्वाचन समितिले कोभिड १९ को संक्रमण रोकथाम र नियन्त्रणका लागि तोकिएको मापदण्ड मापदण्ड र प्रोटोकलसमेतको ख्याल गरी आवश्यक सावधानीका सम्पूर्ण उपायहरुको अवलम्वन गरी निर्वाचन सम्पन्न गर्ने र पदभार हस्तान्तरण हुने बताइएको छ ।
गत २०७५ साल श्रावणमा निर्वाचित बर्तमान कार्यसमितिको २ वर्षे कार्यकाल सकिएपनि विश्वभर महामारीको रुपमा फैलिरहेको कोरोना भाइरस (कोबिड १९) का कारण निर्वाचनमा ढिलाई भएको बताइएको छ ।
आगामी कार्तिक २८ गतेसम्म सदस्यता नविकरण गरिसक्नुपर्ने गरी आगामी पौषको पहिलो शनिवार अर्थात पौष ४ गते निर्वाचनको मिति तोकिएको सर्वोच्च बारले बताएकाे छ । इश्वी सम्वतको नयां वर्षको दिन अर्थात यस वर्ष पौष १७ गते पदभार हस्तान्तरण गर्न साधारणसभाको आयोजना गर्ने निर्णय भएको समेत बताइएको छ ।