भक्तपुर, २८ साउन २०७८लुम्बिनी प्रदेशमा माओवादी केन्द्रका कुलप्रसाद केसी मुख्यमन्त्रीमा नियुक्त भएका छन्।
पहिलो मुख्यमन्त्रीको रूपमा २०७४ फागुन ३ गते नियुक्त भएका शंकर पोखरेलले राजीनामा दिएसँगै लुम्बिनी प्रदेशमा बिहीबार दोस्रो मुख्यमन्त्रीको रूपमा माओवादी केन्द्रका कुलप्रसाद केसी नियुक्त भएका हुन्।
उनलाई प्रदेश प्रमुख अमिक शेरचनले नियुक्त गरेका हुन्। २४ घण्टाको लागि भन्दै बुधबार प्रदेश प्रमुख अमिक शेरचनले आह्वान गरेको मुख्यमन्त्रीको दाबी पेश गर्ने समयभित्र केसीले मात्र दाबी गरेपछि उनी मुख्यमन्त्री बनेका हुन्। उनलाई नेपाली कांग्रेस, जनता समाजवादी पार्टी (जसपा) र राष्ट्रिय जनमोर्चाले समर्थन गरेका छन् ।
केसीले बिहीबार नै सात सदस्यीय मन्त्रिपरिषद गठन गरेका छन्। मन्त्रिपरिषदको पहिलो बैठकले क्यान्सर, किड्नी परिवर्तन र मुटुको भल्व फेर्ने बिरामीहरुलाई उपचारका लागि प्रदेश सरकारका तर्फबाट थप २ लाख रुपैयाँका दरले उपलब्ध गराउने निर्णयसमेत गरेको छ ।