नेकपा एमालेका महासचिव शंकर पोखरेलले नेकपाकालीन एकता जोगाउन नसकेकोमा पछुतो रहेको बताएका छन् ।

आइतबार शुरु भएको माओवादी केन्द्रको आठौं राष्ट्रिय महाधिवेशनको उद्घाटन समारोहलाई सम्बोधन गर्दै एमाले महासचिव पोखरेलले सोकुरा बताएका हुन् ।

अस्पष्ट कार्यनीति र स्वार्थमा अल्झिदा पार्टी एकता जोगाउन नसकिएको उनको भनाइ छ । कसैले कसैलाई दोष दिएर उम्कन नसकिने भन्दै महासचिव पोखरेलले भने, ‘नेकपा गठन गलत थिएन, त्यो ऐतिहासिक आवश्यकता थियो, तर त्यसलाई जोगाउन नसकेकोमा मलाई पछुतो छ ।’

एमाले महासचिव पोखरेलले माओवादीतर्फ इंगित गर्दै आजको परिर्वतनलाई कुनै दल विशेषको उपलब्धीका रुपमा चित्रण गर्नु इतिहासप्रति अन्याय हुने जिकिर गरे ।

माओवादी केन्द्रले गणतन्त्र, संघीयता, धर्म निपरेक्षता, समानुपातिक समावेशी लगायतका परिर्वतन आफ्नो उपलब्धी भएको दाबी गर्ने गरेको छ । यो माओवादी एक्लैको नभई सामूहिकताको परिणाम भएको एमाले महासचिव पोखरेलको भनाइ छ ।