सरकारले नेपाल प्रहरीका एआईजी धीरजप्रताप सिंहलाई प्रहरी महानिरीक्षक नियुक्त गरेसंगै शैलेश थापा क्षेत्रीलाई बिदाइ गरिएको छ । आइतबार प्रहरी प्रधान कार्यालयमा आयोजित विशेष समारोहबीच उनको बिदाइ गरिएको हो ।

बिदाइ समारोहलाई सम्बोधन गर्दै प्रहरी महानिरीक्षक थापाले कोभिड १९ को विषम परिस्थितिमा पनि आम नागरिकको सेवामा कुनै कसर बाँकी नराखेको प्रति सबै दर्जाका प्रहरीको उच्च प्रशंसा गरेका थिए । उनले आफू सेवा निवृत्त भएपश्चात पनि संगठनको हितमा सदैव क्रियाशील रहने प्रतिवद्धता प्रकट गर्दै नवनियुक्त प्रहरी महानिरीक्षकले पनि प्रहरी संगठनको साख बढाउँन थप योगदान गर्ने विश्वास व्यक्त गरे ।

वरियतामा वरिष्ठ रहेका भक्तपुरका एआईजी सहकुल थापालाई उछिन्दै सिंह प्रहरी महानिरीक्षक नियुक्त भएपछि भक्तपुरका प्रहरी महानिरीक्षक थापालाई भक्तपुरकै एआईजीले प्रतिस्थापन गर्ने अवसर भने सफल हुन सकेन । कनिष्ठलाई नियुक्ति दिएपछि भक्तपुरे एआईजी थापा असन्तुष्ट बनेका छन् । स्रोतका अनुसार एआईजी थापा कनिष्ठलाई महानिरीक्षक बनाएको भन्दै विदामा बसेका छन् । सिंह भन्दा थापा ११ महिनाले सिनियर हुन् । एकै समयमा सेवा प्रवेश गरेका सिंह एसएसपीसम्म भने वरियतामा अघि थिए । एआईजी हुँदा भने उनलाई विश्वराज पोखरेल र सहकुल थापाले उछिनेका थिए । मन्त्रिपरिषदको आइतबार बसेको बैठकले सिंहलाई नेपाल प्रहरीको सर्वोच्च पद आईजीपीमा नियुक्त गर्ने निर्णय गरेको हो ।