भक्तपुर, २४ पुस २०७९ प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधव नेपालबीच भेटवार्ता भएको छ । सिंहदरवारस्थित नेकपा (माओवादी केन्द्र)को दलको कार्यलयमा दुई नेताकाबीचमा भेटवार्ता भएको हो ।
यो वर्ता लगत्तै सत्ता गठबन्धन दलको बैठक पनि त्यही बस्दैछ । प्रदेशका मुख्यमन्त्री भागबन्डामा सहमति खोजने गरी सत्ता गठबन्धन दलका नेताहरुको बैठक बस्न लागेको हो ।
माओवादीले कांग्रेससँगको गठबन्धन छोडेर एमालेसँग नयाँ समिकरण निर्माण गरेपछि नेकपा एकीकृत समाजवादी अप्ठ्यारोमा परेको छ ।
कांग्रेससंग गठबन्धन तोडनै पर्ने स्थित आए एमाले अध्यक्ष केपी ओलीसँग सँगै गएर कुराकानी गर्ने प्रचण्ड र नेपालको वीचमा समझदारी भएपनि अन्तिममा प्रचण्ड एक्लै गएर नयाँ समिकरण बनाएपछि नेपाल प्रचण्डसँग रिसाएका छन् । यधपी, प्रचण्ड प्रधानमन्त्री भएपछि यी दुई नेताका बीचको यो तेस्रो भेटघाट हो ।
नेपालले प्रधानमन्त्रीसँग पहिलो पटक प्रचण्डका भान्जा गोकुल भण्डारीको हात्तिवनस्थित निवासमा र दोस्रो पटक प्रधानमन्त्री कार्यालय सिंहदरवारमा भेटवार्ता गरेका थिए । त्यसपछि माओवादी दलको कार्यलयमा यो तेस्रो भेटवार्ता हो ।
प्रधानमन्त्रीले माधव नेपालसंग विश्वासको मत दिन र सरकारमा समेत सहभागि हुन आग्रह गरिरहेका छन् । प्रधानमन्त्रीले पर्सि २६ पुसमा संसदमा विश्वासको मत लिँदैछन् । तर नेपालको पार्टी एकीकृत समाजवादीभित्र देखा परेको दुई धारका कारण यो विषयमा एकीकृत समाजवादीले निर्णय लिएको छैन । यससम्वन्धमा समाजवादीले केन्द्रीय सचिवालयलाई निर्णय गर्न दिने अख्तियारी दिएको छ ।
प्रचण्डले भने आजको छलफलमा विश्वासको मतका विषमया निर्णय लिन नेपाललाई आग्रह गदै आफुलाई सहयोग गर्न आग्रह गरेका छन् ।