भक्तपुर, ५ असार २०८० विशेष अदालतले कर फर्छ्यौट सम्बन्धि एक भ्रष्टाचारको मुद्दामा हालसम्मकै सजाय तोकेको छ । उक्त भ्रस्टाचारमा करिब १६ अर्ब ६६ करोड रुपैयाँ बिगो, जरिवाना र ९ वर्ष कैद सजाय तोकेको हो ।
विशेष अदालतका अध्यक्ष श्रीकान्त पौडेल, सदस्यहरू यमुना भट्टराई र शालिग्राम कोइरालाको पूर्ण इजलासले अहिलेसम्मकै सबैभन्दा ठूलो बिगो जरिवाना तोकेर मुद्दाको फैसला गरेका हुन् ।
यस क्रममा तत्कालीन कर फर्छ्यौट आयोगका अध्यक्ष लुम्बध्वज महतलाई ९ वर्ष १ महिना कैद सजायसमेत तोकिएको छ । आगोगका सदस्य उमेश ढकाल र सदस्य सचिव आन्तरिक राजस्व विभागका तत्कालिन महानिर्देशक चूडामणि शर्मालाई ९ वर्ष कैद सजाय तोकिएको छ ।
अदालतले उनीहरूलाई ६ अर्ब १५ करोड ७० लाख ४६ हजार ४७ रुपैयाँ बिगो कायम गरेको छ । यो मुद्दाका दोषीले जनही दुई अर्ब पाँच करोड ४६ लाख ९ हजार ९४९ रुपैयाँका दरले बिगो तिर्नु पर्ने भएको छ ।
यस्तै, जनही चार अर्ब १० करोड ४६ लाख ९७ हजार ९ रुपैयाँ जरिवाना तिर्नु पर्ने छ । बिगो र जरिवाना गरेर हरेकले ६ अर्ब साढे १६ करोड रुपैयाँ भन्दा बढी तिर्नु पर्ने हुन्छ ।
यसरी हेर्दा तीन जना भ्रष्टाचारका अभियुक्तबाट करिब १६ अर्ब ६६ करोड रुपैयाँ बिगो र जरिवाना सजाय तोकेको हो ।