भक्तपुर, २९ असार २०८०पत्र पत्रिकाको वार्षिक ग्राहक बन्ने पाठक सजिलै भेटिन्छन । पाँच वर्षका लागि ग्राहक बन्ने मानिस औलामै गन्न सकिएला । तर, देशकै जेठो पत्रिका गोरखापत्रले भने शताब्दी ग्राहक बनाएको छ । अर्थात, गोरखापत्रका एक पाठक सय वर्षका लागि पत्रिकाको ग्राहक बनेका छन् ।
शुक्रबार बसुन्धरा–मान प्रतिष्ठान, बालुवाटारले एक सय वर्षका लागि अग्रिम ग्राहक बनेपछि गोरखापत्र संस्थानले १ सय २३ वर्षे इतिहासमा पहिलो शताब्दी ग्राहक पाएको छ । यस अघि देशमा कुनै पत्रिकाका शताब्दी ग्राहक बनेका छैनन् ।
प्रतिष्ठानका सल्लाहकार बद्रीप्रसाद ढकालले एक सय वर्षको ग्राहक शुल्क शुक्रवार भुक्तानी गरेर संस्थानका प्रकाशनको ग्राहक बनेका गोरखापत्र सस्थानले जनाएको हो । ग्राहक (प्रतिष्ठान) ले पत्रिकाबापतको शुल्क अग्रिम भुक्तानी गरेपछि संस्थानले ४० प्रतिशत छुट दिएको बताइएको छ । एक सय वर्षका लागि हुन आउने कुल रकम ३ लाख ६५ हजार रुपियाँमा छुट दिएर २ लाख १९ हजार रुपियाँ संस्थानले भुक्तानी पाएको गोरखापत्रले जानकारी गराएको छ ।
पठन सस्कृतिको बिकास र पत्रपत्रिकाको प्रोत्साहनका लागि सय वर्षे ग्राहक बनेको प्रतिष्ठानले जनाएको छ ।