अन्तर्राष्ट्रिय युवा दिवस नेपालमा एक साता मनाइने भएको छ । सोका लागि मूल समारोह समिति गठन गरिएको छ ।

हरेक वर्ष अगष्ट १२ तारेखमा विश्वव्यापी रुपमा अन्तर्राष्ट्रिय युवा दिवस मनाउने प्रचलन रहेको छ ।युवा तथा खेलकुद मन्त्री डिगबहादुर लिम्बुको अध्यक्षतामा बसेको बैठकले अन्तर्राष्ट्रिय युवा दिवस एक साता मनाउने र त्यसका लागि ६५७ सदस्यीय मूल समिति घोषणा गरिएको युवा परिषदका कार्यकारी उपाध्यक्ष सुरेन्द्र बस्नेतले बताए ।

सन् २०२३ का लागि संयुक्त राष्ट्रसंघले ‘दिगो विकास लक्ष्य प्राप्तिमा युवाको साथ, हरित विश्व निर्माणमा हरित सिप विकास’ भन्ने मूल नारा सहित अन्तर्राष्ट्रिय युवा दिवस मनाउन आह्वान गरेको छ । युवा तथा खेलकुद मन्त्रालयमा सरोकारवाला एवम् विभिन्न क्षेत्रका युवा केन्द्रित संघसंस्था र प्रतिनिधिहरुको उपस्थितिमा आयोजित वृहत् भेलाबाट दिवस मनाउन मूल समारोह समिति बनाइएको बताइएको छ ।

समितिमा परिषदका कार्यकारी उपाध्यक्ष, विभिन्न मन्त्रालयका प्रतिनिधि, प्रदेश युवा परिषदका उपाध्यक्ष, परिषदका सबै सदस्यहरु, नेपाली सेना, नेपाल प्रहरी, सशस्त्र प्रहरी बलका प्रतिनिधि, राष्ट्रिय खेलकुद परिषद, युवा स्वरोजगार कोष र नेपाल स्काउटका प्रतिनिधि रहेका छन् । यस्तै विभिन्न युवा तथा विद्यार्थी संघ संगठनका प्रतिनिधि, हिसान, प्याब्सन, एनप्याब्सन लगायतका प्रतिनिधि पनि रहेका छन् ।

अन्तर्राष्ट्रिय युवा दिवस संयुक्त राष्ट्र संघद्वारा तोकिएको एक जागरूकता दिवस हो। यसको उद्देश्य युवा केन्द्रीत सांस्कृतिक र कानुनी मुद्दाहरूमा ध्यान आकर्षित गर्नु हो। युवा जागरण, अधिकार र सशक्तीकरणका लागि दिवसले महत्वपूर्ण प्रभाव पार्ने बिश्वास रहिआएको छ ।