राष्ट्रिय स्वतन्त्र पार्टी (रास्वपा)ले पार्टीको नेतृत्वमा रहनका लागि शैक्षिक योग्यता निर्धारण गरेको छ । कम्तिमा १२ कक्षा उतीर्ण नगरेका कार्यकर्ता रास्वपाको नेता बन्न नसक्ने गरी शैक्षिक योग्यता निर्धारण गरिएको हो ।

रास्वपाको केन्द्रीय विभागको प्रमुख, पदाधिकारी र सदस्य हुन स्नातकोत्तर पास गरेको हुनुपर्ने मापदण्ड तोकिएको पार्टी प्रवक्ता डा.मुकुल ढकालले जानकारी दिएका हुन् । बिहीबार बसेको पार्टीको केन्द्रीय समिति बैठकले केन्द्रीय विभागका शैक्षिक योग्यता निर्धारण गरेको प्रवक्ता ढकालले जानकारी दिए ।

रास्वपाले प्रदेश विभागको पदाधिकारी वा सदस्यको हकमा कम्तीमा स्नातक गरेको वा ५ वर्षे अनुभव वा असाधारण सफलता हासिल गरेको हुनुपर्ने व्यवस्था गरेको छ । त्यसैगरी पालिका विभाग प्रमुखमा पनि सोही कुरा लागु हुनेछ ।

पालिका पदाधिकारी वा सदस्यहरूको हकमा भने कम्तीमा प्लस टु अध्ययन गरेको हुनुपर्ने वा दुई वर्षको अनुभव चाहिने मापदण्ड तोकेको बताइएको छ ।