भक्तपुर, ५ असोज २०८०आन्दोलनरत नेपाल शिक्षक महासंघ सहमतिमा आएको छ । शुक्रबार साँझ सरकार र शिक्षक महासंघबीच सहमति भएको हो।
उपप्रधानमन्त्री एवं गृहमन्त्री नारायणकाजी श्रेष्ठको उपस्थितिमा शिक्षक महासंघको तर्फबाट अध्यक्ष कमला तुलाधर र सरकारको तर्फबाट शिक्षा विज्ञान तथा प्रविधि मन्त्रालयका सचिव सुरेश अधिकारीले सहमति पत्रमा हस्ताक्षर समेत गरेका वार्तामा सहभागी शिक्षक नेता शंकर अधिकारीले जनाएका छन् ।
सङ्घीय संसदमा दर्ता भएको विद्यालय शिक्षासम्बन्धी विधेयकमा भएका व्यवस्था संविधानसँग नबाझिने गरी महासङ्घका मागलाई अधिकतम् सम्बोधन गराउन सरकारले सहजीकरण गर्ने गरी सहमति भएको बताइएको छ । गृहमन्त्री श्रेष्ठको नेतृत्वमा भएको वार्तामा शिक्षामन्त्री अशोक राई, कानुनमन्त्री धनराज गुरुङ, शिक्षा सचिव सुरेश अधिकारीसहित गृह, अर्थ र कानुन मन्त्रालयका सचिव समेत सहभागी थिए ।
सङ्घीय संसदमा गत भदौ २७ गते दर्ता भएको विद्यालय शिक्षासम्बन्धी विधेयकप्रति असन्तुष्ट महासङ्घले असोज ३ गतेदेखि काठमाडौं केन्द्रित सडक आन्दोलन गरिरहेको छ । सहमति संगै आन्दोलन स्थगित हुने सरकारले बिश्वास लिएको छ ।यद्यपी ४० हजार राहत शिक्षकका प्रतिनिधिले वार्ता बहिस्कार गरेका छन् ।
हेर्नुस छ बुँदे सहमति पत्र
