भक्तपुर, १६ भदौ २०८१प्रेस सेन्टरका नेता, नेपाल पत्रकार महासंघका केन्द्रीय सदस्य एवं समाचार दैनिक अनलाइनका सम्पादक बविन शर्मा (बासुदेव शर्मा) लाई पितृशोक परेको छ ।
उनका पिता लिलाध्वज स्वारको ८१ वर्षको उमेरमा गएराति निधन भएको हो । स्वार कान्तिपुर टेलिभिजनकी समाचार प्रमुख रजनी तामाङका ससुराबुवा समेत हुन् ।
भक्तपुरको चाँगुनारायण-२ स्थित निवासमा स्वारको निधन भएको पारिवारिक श्रोतले जनाएको छ । स्पाइनल इन्जुरीका कारण उनी २ वर्षदेखि हिंडडुल गर्न सक्दैनथे । पछिल्लो समय उनलाई निमोनिया भएको थियो ।
सिन्धुपाल्चोक स्थायी घर भएका स्वार पुराना कम्युनिस्ट नेता समेत हुन् । उनको पार्थिव शरीरमा नेकपा माओवादी केन्द्रका नेता एवं चौतारा सागाचोक गढीका मेयर कृष्ण प्रसाद सापकोटा देशबन्धूले कम्युनिस्ट पार्टीको झण्डा ओडाई सम्मान प्रदान गरेका छन् ।
उनलाई अन्तिम श्रद्धाञ्जली दिन (माओवादी केन्द्र)का केन्द्रीय नेता एवं प्रतिनिधि सभा सदस्य द्वय माधव सापकोटा सुवोध र सूर्यमान दोङ लालध्वज त्यसैगरी बिष्णु सापकोटा जुगल, डिपी ढकाल लगायत केन्द्रीय सदस्यहरु र बागमती प्रदेश सभा सदस्य समेत रहेका माओवादी केन्द्रका प्रदेश अध्यक्ष सरल सहयात्री सहित नेताकार्यकर्ता आर्यघाट पुगेका थिए ।
नेपाल पत्रकार महासंघका अध्यक्ष बिपुल पोख्रेल लगायत धेरै पत्रकारहरु अन्तिम श्रद्धाञ्जलीका लागि उपस्थित रहेका थिए ।
स्वारका २ छोरा र ३ छोरी छन् । पत्रकार बबिन उनका जेठो छोरा हुन् ।