भक्तपुर, ५ माघ २०८१नेपालका लागि चिनियाँ राजदूत छन सङले नेपाल विश्वप्रसिद्ध पर्यटकीय गन्तव्यस्थल भएको बताएका छन् । यहाँका उच्च हिमालय, पर्वत सृंखला, चितवन राष्ट्रिय निकुन्जको प्राकृतिक सौन्दर्यता र लुम्बिनी, काठमाडौं, जनकपुर जस्ता प्राकृतिक साथै सांस्कृतिक र ऐतिहासिक सम्पदाले प्रत्येक वर्ष विभिन्न देशका पर्यटकहरुलाई नेपाल भ्रमण गर्न आकर्षित गर्दै आएको उनले बताए ।
‘नेपाल भ्रमण वर्ष २०२५’ को घोषणा तथा ‘चिनियाँ नयाँ वर्ष २०२५’ को शुभारम्भ कार्यक्रमलाई शनिबार भक्तपुरको दरबार क्षेत्रमा सम्बोधन गर्दै राजदूत सङले चिनियाँ पर्यटकहरुलाई नेपाल भ्रमण गर्न प्रेरित गर्ने प्रतिवद्धता पनि प्रकट गरे ।
नेपाल र चीनबीच विगतमा भएका सहमतिको कार्यान्वयन गर्नु, दुई देशबीचको पर्यटन सहकार्यलाई थप उचाइमा पु¥याउनु र दुई देशबीचको मानवीय सम्बन्धलाई अझ प्रगाढ बनाउनु नेपाल कार्यक्रमको मुख्य उद्देश्य रहेको उनले प्रष्ट पारे ।
नेपाल र चीनबीच आपसी सहयोग आदानप्रदान तीव्र गतिमा बढिरहेको बताउँदै उनले नेपाल-चीनबीच युवा, शिक्षा, संस्कृति, पर्यटनलगायतका क्षेत्रहरुमा सहकार्यलाई सुदृढ गर्ने, मानवीय सम्बन्धलाई थप प्रगाढ बनाउने र पुस्तौं पुस्तादेखि चलिआएको मित्रतालाई निरन्तरता दिने विषयमा चीन दृढ रहेको उनले जानकारी दिए ।
सन् २०२५ मा नेपाल पर्यटन वर्षसम्बन्धी प्रवर्धनात्मक गतिविधिहरु आयोजना गर्नका लागि चीनको भूमिमा उनले स्वागत समेत गरे ।
‘नेपाल भ्रमण वर्ष २०२५’ को घोषणा तथा ‘चिनियाँ नयाँ वर्ष २०२५’ को शुभारम्भ कार्यक्रममा पहिलो र दोस्रो चरण गरी भक्तपुर र चिनियाँ जनजीवन झल्काउने सांस्कृतिक गीत र नाँचहरु प्रस्तुत गरिएको थियो । सो अवसरमा दरबार क्षेत्रबाट टौमढीसम्म सांस्कृतिक ¥याली समेत आयोजना गरियो ।