शीतलहरका कारण बढेको चिसोले रौतहटमा ३ जनाको ज्यान गएको छ ।

रौतहटको गढीमाई नगरपालिका –४, का ५५ वर्षीय महर्जन ठाकुर हजाम, राजदेवी नगरपालिका –७, मुडवलवाका ७५ वर्षीय अयोधी राय यादव र गढीमाई नगरपालिका १ स्थित चिमनीभट्टामा काम गर्न आएका सर्लाही रामवनका ५५ वर्षीय नेक महम्मद अलीको मृत्यु भएको जिल्ला प्रहरी कार्यालय रौतहटले जनाएको छ ।

त्यस्तै शीतलहर बढेर जनजीवन प्रभावित भएपछि रौतहटमा जाडो बिदा दिइएको छ । गत सोमबारदेखि बन्द रहेको रौतहटको सामुदायिक विद्यालय पुस २६ गते सम्मलाई थप गरिएको जिल्ला शिक्षा अधिकारी राम विनय कुमार सिंहले जनाएका छन् ।

तराईका जिल्लाहरुमा शीतलहरका कारण केहीदिनदेखि अत्यधिक जाडो बढेको छ ।