सिन्धुली, ५ जेठभनिन्छ लोग्नेस्वास्नीको झगडा परालको आगो जस्तो हो । छिट्टै सल्कन्छ र छिट्टै निभ्छ । तर, सामान्य झगडामा यहाँ एकजनाले आफ्नो श्रीमतीको हत्या गरेका छन ।
जिल्लाको घ्याङलेख गाउँपालिका–३ तामाजोर लप्सेमा श्रीमानले श्रीमतीको हत्या गरेका हुन् ।
४६ वर्षीय स्थानीय एकिङबहादुर गोलेले ४२ वर्षीया श्रीमती सुपरानी गोलेको हत्या गरेका हुन् । शुक्रबार रक्सी खाने पैसा माग्दा नदिएपछि आवेशमा आएका एकिङबहादुरले सुपरानीको जीवन नै समाप्त पारिदिए ।
गोलेले खाना पस्कने पन्युले झटारो हान्दा पन्यु सुपरानीको टाउकामा गाडिएको र घटनास्थलमा नै उनको मृत्यु भएको हो ।
प्रहरीका अनुसार शुक्रबार अपरान्ह गोले दम्पतीको सामान्य बिबाद बढ्दै गएपछि एकिङबहादुरले श्रीमती सुपरानीलाइ खाने पस्कने पन्यूले झटारो हानेका थिए । पन्यु सुपरानीको टाउकोमा गाडिएपछि उनको तत्कालै ज्यान गएको थियो ।
प्रहरीले घटनाबारे थप अनुसन्धान भैरहेको भनेको छ ।