भक्तपुर, १६ साउन काभ्रेमा कार्यरत ५ प्रहरी नै पक्राउ परेका छन् । अरुलाई पक्राउ गर्नपर्ने प्रहरीलाई नै अख्तियारले पक्राउ गरेको हो । घुस खाएको अभियोगमा उनीहरु पक्राउ परेका हुन् ।
अख्तियार दुरुपयोग अनुसन्धान आयोगको टोलीले २ हवल्दारसहित ५ जनालाई घुसको रकमसहित पक्राउ गरेको बताइएको छ । उनीहरुलाई टिपर व्यवसायीसंग पैसा लिदालिदै पक्रिएको अख्तियारको दावी छ ।
प्रति चेक पोस्ट प्रति टिपर महिनावारी मासिक २ हजार रुपियाँको दरले असुल्ने गरेको उजुरीको आधारमा अख्तियारको विशेष टोलीले छापा हान्दा उनीहरु सप्रमाण पक्राउ परेका बताइएको छ ।
अख्तियारका अनुसार हवल्दार रामहरी मानन्धर, ट्राफिक प्रहरीका जवान तेजप्रसाद भट्टराई, ट्राफिक प्रहरी कार्यालय बनेपाको पोष्टमा कार्यरत प्रहरी जवान हरिप्रसाद बाँनियालाई टिपर चालकसँग २/२ हजार घुस लिँदै गर्दा अख्तियारको टोलीले पक्राउ गरेको हो ।
त्यसैगरी पाँचखाल प्रहरी चौकीमा कार्यरत प्रहरी हवल्दार भक्तबहादुर हायु र प्रहरी जवान ज्ञानबहादुर लाम्गाडेलाई पनि टिपरसँग मासिक २ हजार असुल्ने क्रममा अरनिको राजमार्गअन्तर्गत केराघारीबाट अख्तियारको टोलीले पक्राउ गरेको हो।
पक्राउ परेका प्रहरीलाई नियन्त्रणमा लिएर आवश्यक अनुसन्धान गरिरहेको अख्तियारले जनाएको छ ।