भक्तपुर, ९ असोज २०७९नेकपा(माओवादी केन्द्र) को शुभेच्छुक पत्रकार संगठन प्रेस सेन्टर नेपालले आफ्नो उपत्यका प्रदेशको महासचिवमा रोजिना थापालाई पदोन्नती गरेको छ । सचिव पदमा रहेकी उनी बिस्तारित बैठकबाट महासचिव चयन भएकी हुन् ।
शनिवार काठमाडौमा सम्पन्न प्रदेश समितिको बिस्तारित बैठकले थापालाई महासचिवमा सर्वसम्मत चयन गरेको अध्यक्ष नवराज दाहालले बताए । बैठकले रिक्त पदाधिकारी पदपूर्ती गरेको बताउदै अध्यक्ष दाहालले महासचिव थापा संगै सचिवमा सरिता थापा र बिक्रम रत्न त्यसैगरी कोषाध्यक्षमा नेत्रप्रसाद न्यौपाने र सदस्यमा उषा काफ्लेलाई समेत सर्वसम्मत चयन गरेको जानकारी गराए । काठमाडौ,ललितपुर र भक्तपुर जिल्ला समेटिएको उपत्यका प्रदेश समिति ४१ सदस्यीय रहेको अध्यक्ष दाहालले जानकारी दिएका छन् ।
बिस्तारित बैठकलाई सम्बोधन गर्दै प्रेस सेन्टर नेपालका इन्चार्ज एवं पार्टीका पोलिटब्युरो सदस्य महेश्वर दाहालले माओवादी केन्द्र नै देशको सच्चा र क्रान्तिकारी पार्टी भएको भन्दै यसमाथि फ़िजाइएका भ्रमहरु चिरेर ययार्थ जनता समक्ष प्रस्तुत गर्नुपर्ने दायित्व पत्रकारले पूरा गर्नुपर्ने आवश्यकता औल्याए । त्यसैगरी प्रेस सेन्टरका केन्द्रीय अध्यक्ष विष्णु सापकोटा जुगलले राजनीतिक बैचारिक प्राविधिक र पेशागत रुपमा पत्रकारलाई दक्ष र योग्य बनाउन योजनाहरु अघि सार्ने उल्लेख गर्दै वर्तमान अवस्थामा संघीय लोकतान्त्रिक गणतन्त्र र परिवर्तनको रक्षा गर्नुपर्ने दायित्व पूरा गर्न आफूहरु परिवर्तन बिरोधी विरुद्ध बछ्यु बनेर जाइलाग्ने बताए ।
बैठकलाई सम्बोधन गर्दै नेकपा (माओवादी केन्द्र) का बागमती प्रदेश अध्यक्ष सरल पौडेल सहयात्रीले तत्कालिन जनमुक्ति सेनाको भूमिका पत्रकारले पूरा गर्नुपर्ने प्रष्ट पारे । कलमलाई बन्दुक झैँ शक्तिशाली नबनाई परिवर्तनको रक्षा हुन नसक्ने अवस्था आएको खुलासा गर्दै अध्यक्ष सहयात्रीले त्यसको लागि प्रेस सेन्टरले नेतृत्व गर्नुपर्ने बताए ।
उक्त अवसरमा प्रेस सेन्टरका बरिष्ठ उपाध्यक्ष कमल गिरी, उपाध्यक्ष एवं उपत्यका इन्चार्ज निर्मल ज्ञवाली, उपाध्यक्ष मनोज घर्तीमगर र रुबी श्रेष्ठ त्यसैगरी महासचिव सन्तोष पौडेल लगायतले प्रेस सेन्टरको औचित्व र महत्व माथि प्रकाश पारेका थिए ।