९ बैशाखकाठमाडौँ ।
नेकपा–एमाले र नेकपा माओवादी केन्द्रको संयुक्त कार्यक्रम झण्डै चार घण्टापछि शुरु भएको छ ।
नेपाल कम्युनिस्ट पार्टीको ६९ औं स्थापना एवं १४८ औं लेनिन जयन्तिको अवसरमा नेकपा एमाले र माओवादी केन्द्रले संयुुक्त आयोजना गरेको कार्यक्रम ब्यानर विवादले रोकिएको प्रभावित भएको थियो ।
पहिलेको ब्यानरमा मार्क्स, लेनिनकै फोटो नभएपछि माओवादी केन्द्रका कार्यकर्ताले कार्यक्रममा अवरोध सिर्जना गरेका थिए । अहिले नयाँ ब्यानर र कार्ल मार्क्स र लेनिनको फोटो ल्याएसँगै कार्यक्रम सुरु भएको छ । संयुक्त कार्यक्रममा दुईवटा ब्यानर राखिएको छ । मार्क्स र लेनिनको तस्वीर मञ्चमा मेचमाथि राखिएको छ ।
कार्यक्रममा राखिएको ब्यानरमा लेनिनकै फोटो नभएपछि र कम्युनिस्ट नेताहरुको लहरमा नेकपा एमालेका संस्थापक नेताहरुको मात्र फोटो राखिएको भन्दै माओवादी केन्द्रका कार्यकर्ताले विरोध प्रदर्शन गरेका हुन् ।
पार्टी एकताका लागि सकारात्मक सन्देश दिनेगरी नेकपा एकालेका अध्यक्ष एवं प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहालले सम्बोधन गर्नेगरी तय भएको छ ।