सर्लाही तथा रौतहटको सिमानामा पर्ने बागमती नदिले बगाएर बेपत्ता बनेका दुई युवा मृत अवस्थामा फेला परेका छन् ।

आइतवारदेखि बेपत्ता बनेका युवाहरुको खोजी कार्यमा संलग्न प्रहरीले सोमबार बिहान साढे आठ बजे तिर बगाएको ठाउँ भन्दा करिब दुई किमि दक्षिण खोलाको किनारमा माटोले पुरिएको अबस्थामा दुवै युवाको शव फेला परेको सर्लाही प्रहरीले जनाएको छ ।

साथीहरुसंग बागमती नगरपालिका – ११ बुद्ध शान्ति तपोबन नजिकबाट बागमती नदिमा पौडी खेल्न पसेका लालबन्दी नगरपालिका- १७ रानिगन्जका २२ बर्षिय संजय बस्नेत र सोही ठाउँका राजेश ब्लोन बेपता भएका थिए । अर्का राम श्रेष्ठलाई भने स्थानियले देखेर सकुशल उद्धार गरेका थिए ।

अहिले बस्नेत र ब्लोनको शवलाई पोस्ट मार्टमको लागि जिल्ला अस्पताल मलंगवा पठाइएको इलाका प्रहरी कार्यालय कर्मैयाले जनाएको छ ।
यस अघि पनि पटक पटक त्यस क्षेत्रमा नुहाउन जानेहरुलाई खोलाले बगाउने गरेको र त्यस क्षेत्रमा पौडी खेल्न रोक लगाएको भए पनि खोलामा पसेर लुकिछिपी युवाहरु जाने गरेको कारण पनि यस्तो दुर्घटना भैरहेको नेपाली कांग्रेस बागमती नगर कमिटी सभापति दिपक रानाभाटले जानकारी दिए ।