आज त्रिभुवन विश्वविद्यालयको ४५ औँ दीक्षान्त समारोह हुँदै छ। त्रिभुवन विश्वविद्यालयले दीक्षान्त समारोह पुल्चोकको इन्जिनियरिङ क्याम्पस परिसरको खेल मैदानमा हुने जनाएको छ।

यसअघि त्रिविले कीर्तिपुर र दशरथ रंगशालामा आयोजना गर्ने दीक्षान्त समारोह पछिल्लो केही वर्षदेखि पुल्चोक इन्जिनियरिङ क्याम्पस परिसरमै गर्दै आएको छ।

यसपटक दीक्षान्त समारोहमा सहभागी हुन ७० हजार ७७ विद्यार्थी योग्य भए पनि १० हजार १ सय ८३ विद्यार्थीले मात्र फाराम भरेको परीक्षा नियन्त्रण बल्खुले जनाएको छ । परीक्षा नियन्त्रण बल्खुका अनुसार अनलाइनबाट फाराम भर्ने व्यवस्था गरेकाले गत वर्षबाट सहभागी हुनेहरूको संख्या बढेको छ ।

बंगलादेशको ढाका विश्वविद्यालयका उपकुलपति प्राध्यापक डाक्टर मोहम्मद अतिरुज्मानलाई त्रिविले दीक्षान्तमा विशेष अतिथिका रुपमा आमन्त्रण गरेको छ।