भक्तपुर, ४ माघ अमर कला केन्द्र कालिमाटीद्वारा आयोजित उपत्यकाव्यापी ‘लेट्स डान्स’ को चौथो संस्करण सम्पन्न भएको छ । शुक्रवार काठमाडौको राष्ट्रिय नाचघरमा अन्तिम प्रतिस्पर्धापछि चौथो संस्करण सम्पन्न भएको हो ।
चार सय जना सहभागीबाट पाँच चरण पार गरी अन्तिम प्रतिस्पर्धामा पच्चीस जना सहभागी भएकामा पाँच जना पुरस्कृत भएका आयोजकको भनाइ छ ।
भक्तपुरपोस्टलाई प्राप्त जानकारी अनुसार पाँच जना पुरस्कृत भएकामा भक्तपुर बाट सहभागी तीन जनाले पुरस्कार हात पार्न सफल भएका छन् । जसमध्ये प्रसन्ना श्रेष्ठले थर्ड रनर अप हुँदै तक्मा, शिल्ड,प्रमाणपत्रका साथै पाँच हजार रुपियाको चेक समेत प्राप्त गरेकी छन् । उनी दुवाकोट स्थित प्रज्ञा इङ्लिस स्कूलकी विद्यार्थी हुन् ।
त्यसैगरी सेकेन्ड रनर अप हुन सफल सन्जु तामाङ्ग पनि थिमीस्थित लर्डबुद्धकी विद्यार्थी हुन् । उनले सेकेन्ड रनर अप हुँदै तक्मा, शिल्ड,प्रमाणपत्रका साथै पन्ध्र हजार रुपियाको चेक प्राप्त गरिन् ।
उक्त प्रतियोगितामा फस्ट रनर अप पनि भक्तपुरकै सगुन श्रेष्ठ भइन् । सगुन थिमीस्थित नवरत्न इङ्लिस स्कूलमा कक्षा ८ मा अध्ययनरत छात्रा हुन् । उनी भरत नाट्यमको बेसिक लेभलमा उत्कृष्ट नृत्य गर्दै फस्ट रनर अप हुन सफल भएकी हुन् । सगुनले फस्ट रनर अप हुँदै तक्मा, शिल्ड,प्रमाणपत्रका साथै पच्चीस हजार रुपियाको चेक प्राप्त गरिन् ।
कलाकारद्वय महेश गोदार र प्रशान्त तामाङ्ग निर्णायक रहेको उक्त प्रतियोगितामा चौथो रनर अप काठमाडौंकी रश्मी विष्ट बनेकी थिइन् भने प्रतियोगिताको टाइटल बिजेताको उपाधि काठमाडौंकी दीपिका मगरलाई दिइएको थियो । दीपिकाले तक्मा, शिल्ड,प्रमाणपत्रका साथै पचास हजार रुपियाको चेक प्राप्त गरेकी छिन् ।