भक्तपुर, ३ चैत माध्यमिक शिक्षा परीक्षा(एसईई) संचालन गर्न सातै प्रदेश सरकारले ‘ग्रिन सिग्नल’ दिएका छन् । प्रदेश सरकारका सामाजिक विकास मन्त्रीहरु एसईई परीक्षाको विषयमा एकमत देखिएका हुन् ।
सोमबार सिंहदरवार स्थित शिक्षा, विज्ञान तथा प्रविधि मन्त्रालयका मन्त्री गिरिराजमणि पोखरेलको अध्यक्षतामा बसेको बैठकमा प्रदेश सरकारका मन्त्रीहरुले एसईई परीक्षा रोक्नु आवश्यक नरहेको निष्कर्ष निकाले । कोरोना भाइरस (कोभिड १९) ले विश्वव्यापी महामारीको रुप लिएको अवस्थामा बिहीवार देखि शुरु हुने एसईई परीक्षाको विषयमा बैठकमा छलफल भएको थियो ।
नेपालमा कोरोना भाइरस (कोभिड १९) को कुनै प्रभाव नपरेकोले बिहीवार देखि शुरु हुने परीक्षा रोक्नुपर्ने अवस्था नरहेको बैठकले निष्कर्ष निकालेको हो । परीक्षाको सम्पूर्ण तयारी पूरा भैसकेको भन्दै प्रदेशका सामाजिक विकाश मन्त्रीहरुले कोरोना भाइरसको जांच पछि परीक्षा केन्द्रमा प्रवेशको बातावरण मिलाइने बताए । एसईई परीक्षालाई कोरोनासंग जोडेर आतंकित हुनुपर्ने अवस्था नभएको संदेश विद्यार्थी र अभिभावकलाई दिनुपर्नेमा समेत सहभागीहरुले जोड दिएका थिए । विद्यार्थी र अभिभावक आश्वस्त नबने परीक्षा लिनुको अर्थ नहुने भन्दै बैठकमा सरकारले सरोकारवालामा सचेतना फैलाउनु पर्ने आवश्यकता समेत औल्याइएको एक सहभागीले भक्तपुर पोस्टसंग भने ।
बैठकमा परीक्षालाई मर्यादित र व्यवस्थित बनाउने विषयमा गरिएका तयारीबारे जानकारी आदानप्रदान समेत गरिएको बताइएको छ ।
उक्त बैठकमा जिल्लामा संघ र प्रदेशले संयुक्त रुपमा एकीकृत सामाजिक बिकासका कार्यालयहरु संचालन गर्ने विषयमा मन्त्री गिरिराजमणि पोखरेलले प्रस्ताव गरेका थिए । शिक्षा विकाश, विज्ञान प्रविधि, खेलकुद, महिला विकाश लगायतका कार्यालय संयुक्त बनाउन उनले प्रस्ताव गरे । मन्त्री पोखरेलको प्रस्तावमा प्रदेशका सामाजिक विकाश मन्त्रीहरुले आफूहरुले प्रदेश मन्त्रीपरिषदमा यस विषयमा छलफल गर्ने प्रतिवद्धता प्रकट गरेका थिए । त्यसैगरी उक्त बैठकमा नयाँ आर्थिक वर्षका लागि आवस्यक बजेट र नीति तथा कार्यक्रमका बारेमा समेत छलफल भएको मन्त्रालय श्रोतले भक्तपुर पोस्टलाई बताएको छ ।