१ असार २०७७काठमाडौँ । नेपालमा थप ४ सय ५१ जना कोरोना भाइरसका संक्रमित थपिएका छन् । नयाँ संक्रमितसँगै नेपालमा कूल संक्रमितको संख्या ६ हजार २ सय ११ पुगेको छ ।
पछिल्लो २४ घन्टामा ६७ जना निको भएर घर फर्किएको स्वास्थ्य तथा जनसंख्या मन्त्रालयले जनाएको छ ।मन्त्रालयले सोमबार आयोजना गरेको नियमित मिडिया ब्रिफिङमा प्रवक्ता डा जागेश्वर गौतमले दिएको जानकारी अनुसार संक्रमित हुनेमा मोरङका २२, पर्साका १० जना, रौटहटका १०२, तनहुँका ५, अछामका ३, कैलालीका ३, डोटीका ४, बाँकेका ५, बर्दियाका १६, प्युठानका ३, दैलेखका ९३, महोत्तरीका २१ जना छन् ।
यस्तै धनुषाका ४, नुवाकोटका ३, अर्घाखााँचीका ३, चितवनका १, गुल्मीका ९, रुपन्देहीका १२, सुनसरीका ३, झापाका १, सुर्खेतका १९, रोल्पाका ४, काठमाडौंका ४, दाङका ४३, धादिङका ९, ललितपुरका १, बाराका १, कपिलवस्तुका १, पाल्पाका १०, सर्लाहीका २३ र सिरहाका ४ जना संक्रमित भएका छन् ।
पीसीआर परीक्षणका लागि पोखरामा थप एक प्रयोगशाला व्यवस्था गरिएको प्रवक्ता गौतमले जानकारी दिए । उनका अनुसार अब मुलुकभर २२ स्थानमा पीसीआर परीक्षण हुने भएको छ ।
नेपालमा कोरोना संक्रमण निको भएर पछिल्लो २४ घन्टामा ६७ जना डिस्चार्ज भएका छन् । कोभिड १९ अस्पताल जनकपुरबाट २४, पाटन अस्पतालबाट ४, कोभिड १९ युनिफाइड कमाण्ड अस्पताल बलम्बुबाट २, त्रिवि शिक्षण अस्पतालबाट २, कलैया अस्पताल बाराबाट ६, साई कृष्ण आइसोलेसनबाट १७ र कोरोना विशेष अस्पताल दाङबाट १२ जना डिस्चार्ज भएका प्रवक्ता गौतमले जनाए । यो सँगै निको हुनेको संख्या १ हजार ४१ पुगेको छ ।
मन्त्रालयकाअनुसार सोमबारसम्म नेपालमा आरडीटी विधिबाट २ लाख १९ हजार ३३६ नमुना परीक्षण भएका छन् । २४ घन्टामा ८ हजार ६१५आरडीटी परीक्षण भएका छन् । पीसीआर विधिबाट भने हालसम्म १ लाख ३८ हजार ६८३ परीक्षणहरु गरिएका छन् र २४ घन्टामा ५ हजार ३०६ परीक्षण भएका छन् ।
हालसम्म क्वारेन्टाइनमा रहनेको संख्या १ लाख ३३ हजार ८२९ जना रहेका छन् । त्यसैगरी आइसोलेसनमा रहनेको संख्या ५ हजार १५१ जना रहेका छन् ।
नेपालमा कोरोनाबाट निको हुनेको संख्या १ हजार ४१ पुगेको छ ।