भक्तपुर, १० पुस संविधानले चिन्दै नचिन्ने एक ‘आदेश’को भरमा प्रधानमन्त्री केपी शर्मा ओलीले प्रतिनिधि सभा विघटन गरेको र त्यसमा राष्ट्रपतिले अविवेकी लाहाछाप लगाएको भन्दै नागरिक प्रतिरोध हुने भएको छ । प्रधानमन्त्री र राष्ट्रपतिको कदम प्रतिगामी भएको र यसले आम जनसाधरणको मनमा गहिरो चोट परेको निष्कर्ष सहित प्रतिरोधका कार्यक्रम सार्वजनिक गरिएको हो ।
वृहत् नागरिक आन्दोलनले संघर्षका कार्यक्रम सार्वजनिक गर्दै आम नागरिकलाई संघर्षमा सहभागी बन्न आह्वान समेत गरेको छ । एक विज्ञप्तीमार्फत प्रतिनिधि सभा विघटन गर्ने कदमको यसअघि नै भत्सर्ना गरिसकेको वृहत् नागरिक आन्दोलनका संयोजक युग पाठकले प्रधानमन्त्रीको कदम सामान्य राजनीतिक दाउपेच मात्र नभई प्रष्ट हुनेगरी प्रतिगमनको रोडम्याप सामुन्ने आएको बताए ।
प्रतिगमनको ठूलो कदमले दैलैमा टेकेपछि हालसम्म प्राप्त उपलब्धि नै गुमेर मुलुक अँध्यारो सुरुङमा प्रवेश गर्न लागेको विषयमा चासो र चिन्ता हुनु स्वाभाविक ठहर गर्दै प्रतिगमनबाट मुलुकलाई जोगाउँदै थप उपलब्धि प्राप्त गर्न सडकमै उत्रनु सबै नागरिकको कर्तव्य भएको उनको भनाइ छ । संयोजक पाठकका अनुसार प्रतिगमनको सशक्त प्रतिरोध गर्न निम्न संघर्षका कार्यक्रम घोषणा गरिएको छ ः
क. संघर्षका कार्यक्रम ः
१. पौष ११ गते शनिबार ः शंख एपिसोडसहित कोणसभा
२. पौष १३ गते सोमबार ः डम्फु एपिसोडसहित कोणसभा
३. पौष १५ गते बुधबार ः धिमे एपिसोडसहित कोणसभा
४. पौष १७ गते शुक्रबार ः च्याब्रुङ एपिसोडसहित कोणसभा
५. पौष १८ गते शनिबार ः सडक नाटकसहित वृहत्नागरिक सभा
संघर्षका सबै कार्यक्रममा कविता, संगीत लगायतका कलात्मक प्रस्तुति हुनेछन् ।
ख. ब्यानर
१. मूल ब्यानर ः प्रतिगमन विरुद्ध वृहत्नागरिक आन्दोलन ।
ग. समय र स्थान
१. स्थान ः माइतिघर समय ः हरेक दिन दिउँसो २ बजे ।