भक्तपुरपोस्ट संवाददाता भक्तपुर, २७ जेठ
भक्तपुर, २७ जेठगण्डकी प्रदेशका मुख्यमन्त्री पृथ्वीसुब्बा गुरुङ पदमुक्त भएका छन् । गुरुङले बिहीबार प्रदेशसभामा विश्वासको मत मागेका थिए । तर, उनको पक्षमा २७ मत मात्र प्राप्त भएको छ भने विपक्षमा ३० मत खसेको छ ।
मतदानमा प्रदेश सरकारका युवा तथा खेलकुदमन्त्री दीपक मनाङे नै अनुपस्थित भए । उनी स्वतन्त्र सांसद हुन् । राष्ट्रिय जनमोर्चाका सांसद कृष्ण थापा तटस्थ रहे । नेकपा (एमाले) का सांसद मात्र साथमा रहंदा उनी अल्पमतमा परी मुख्यमन्त्री गुरुङ पदमुक्त भए ।
नेपाली कांग्रेसका १५ जना, नेकपा माओवादी केन्द्रका ११ जना, जनता समाजवादी पार्टीका २ जना र राष्ट्रिय जनमोर्चाका सांसदहरु पियारी थापा र खिमबिक्रम शाहीले विपक्षमा मतदान गरेका हुन् ।
अब संविधानको धारा १६८(५) अनुसार नयाँ सरकार गठनको प्रक्रिया सुरु हुनेछ ।