भक्तपुर, ६ पुस २०७८नेकपा (माओवादी केन्द्र)को बागमती प्रदेश अध्यक्षमा सिन्धुपाल्चोकका नेता सरल सहयात्री पौडेल निर्वाचित भएका छन् । उनी माओवादीद्वारा संचालित तत्कालीन जनयुद्धमा मध्यम तहका कमाण्डर समेत हुन् । जन सास्कृतिक महासंघका संयोजक समेत रहेका सहयात्री पार्टीको पहिलो बागमती प्रदेश अध्यक्ष बन्न सफल भएका छन् ।
सोमबार सम्पन्न निर्वाचनबाट उनी प्रदेश अध्यक्षमा निर्वाचित भएका भक्तपुर संयोजक एवं बागमती प्रदेश सदस्य डिपी ढकालले पुष्टि गरे । ढकालले दिएको जानकारी अनुसार प्रदेश समितिको बैठकमा सहमति हुन नसकेपछि निर्वाचनबाट नेतृत्व चयन भएको हो । यसअघि प्रदेश अधिवेशनले नेतृत्व पछि टुंगो लगाउने गरी २७५ सदस्यीय बागमती प्रदेश समिति निर्विरोध निर्वाचित गरेको थियो । 
काठमाडौको बत्तिसपुतलीस्थित अनुपम पार्टी प्यालेसमा सोमबार भएको निर्वाचनमा प्रदेश अध्यक्षका लागि सिन्धुपाल्चोकका नेता सहयात्री र काभ्रेका नेता दिनानाथ गौतमको उम्मेदवारी परेको थियो । सहयात्रीले ८६ का बिरुद्ध १६२ मत प्राप्त गरी प्रथम अध्यक्ष बन्न सफल भएका निर्वाचन समितिले जनाएको छ ।
उपाध्यक्षमा रुपा महर्जन, प्रेमबहादुर पुलामी र रामप्रसाद ढुंगाना बिजयी बनेका छन् भने सचिवमा इन्द्रबहादुर थिङ बिजयी बनेका बताइएको छ ।
