पाटन दरबार क्षेत्रस्थित विश्व सम्पदा सूचीकृत ऐतिहासिक भिमसेन मन्दिरको पुनःनिर्माण कार्य सम्पन्न भएको छ । भिमसेन मन्दिर पुनःनिर्माण सरोकार समिति मार्फत मन्दिर पुनःनिर्माण कार्यले पूर्णता पाएको हो।

सो मन्दिर समुदायको अगुवाईमा पुनःनिर्माण भएको पाटन दरबार क्षेत्रको पहिलो मन्दिर बन्न पुगेको छ । त्यति मात्र नभई पुनःनिर्माणमा लागेको कूल लागत मध्ये समुदायकै बढी हिस्सा ओगटिएको छ ।

मन्दिर पुनःनिर्माणमा ४ करोड ९३ लाख रकम खर्च भएको समितिले जनाएको छ। पुनःनिर्माणको लागि एभरेष्ट बैंकका अध्यक्ष बीके श्रेष्ठले १ करोड रुपैयाँ, नेपाल इन्भेष्टमेन्ट बैंकले १ करोड रुपैयाँ प्रदान गरेका थिए । त्यसैगरी ललितपुर महानगरपालिकाबाट १ करोड रुपैयाँ, ललिपुर क्षेत्र नं ३ का सांसद् पम्फा भुसाल र क्षेत्र नं २ का सांसद् कृष्णलाल महर्जनको निर्वाचन क्षेत्र विकास पूर्वाधार कार्यक्रम र वाग्मती प्रदेश सभा सदस्य ज्ञानेन्द्र शाक्यको सांसद् विकास कोषबाट आर्थिक सहयोग उपलब्ध गराइएको थियो।बाँकी विभिन्न मनकारीहरुबाट रकम जुटाइएको अध्यक्ष कृष्णलाल महर्जनले जानकारी दिए ।

मन्दिर पुनःनिर्माणमा काठमाडौं उपत्यका संरक्षण कोष (केभीपीटी) को प्राविधिक सहयोग रहेको छ । मन्दिर पुनःनिर्माण कार्य २०७५ माघ ७ गते शुरु गरिएको थियो ।बैशाख १२ गतेको विनाशकारी भूकम्पले क्षतिग्रस्त दरबार क्षेत्रका मन्दिरहरु मध्ये भिमसेन मन्दिर समुदायले अपनत्व गरी पुनःनिर्माण थालेको पहिलो मन्दिर रहेको समितिका अध्यक्ष कृष्णलाल महर्जनले बताए ।

मन्दिर पुनःनिर्माणले समितिले अघि सारेको हाम्रो सम्पदा, हामी आफै बनाऔं भन्ने नारा व्यवहारतः स्थापित भएको पनि समितिका अध्यक्ष महर्जनको भनाई रहेको छ । मन्दिर पुनःनिर्माण सम्पन्न भएको अवसरमा शनिबार धार्मिक पुजाको आयोजना गरिएको थियो । भूकम्पले क्षतिग्रस्त पाटनका अन्य पाँच सम्पदा कृष्णमन्दिर, विश्वनाथ मन्दिर र चारनारायण मन्दिर मणिमण्डपका दुई पाटी, कृष्णमन्दिरको पुनःनिर्माणको कार्य सम्पन्न भइसकेको छ।ती मन्दिरहरुको काठमाडौं उपत्यका संरक्षण कोष ‘केभिपिटी’ ले विभिन्न दातृ निकाय, राजदूतावासको सहयोगमा पुनःनिर्माण गरेको थियो ।

मन्दिर पुनःनिर्माणले सम्पदा पुनःनिर्माणमा स्थानीयको भूमिकाको रोल मोडेल स्थापित गरेको उर्जा, जलस्रोत तथा सिंचाई मन्त्री पम्फा भुसालको भनाई रहेको छ संघले ‘ सीड मनी ’ को रुपमा १० लाख रुपैयाँ राखेर पुनःनिर्माण कार्य शुरु गरिएको थियो।निर्माण कार्यसंगै मनकारीहरुको सहयोग मिल्दै गएको पनि समितिले जनाएको छ ।