भक्तपुर, ३० कार्तिक २०८१अन्नको सम्मान गर्ने पर्वको रुपमा रहेको सकिमना पुन्ही (पिँडालु उसिन्ने पूर्णिमा) सम्पन्न भएको छ । नेपाल भाषामा सकिको अर्थ पिडालु र मानाको अर्थ उसिन्नु हो भने पुन्ही भनेको पूर्णिमा हो । यस अर्थमा सकिमना पुन्हीको अर्थ पिडालु उसिनेर खाने पूर्णिमा भन्ने हुन्छ ।
प्रत्येक वर्ष कार्तिक शुक्ल पूर्णिमाका दिन घरघरमा पिडालु उसिनेर खाई यो पर्व मनाउने प्रचलन रहेको छ । उसिनेको पिँडालुले शरीरलाई न्यानो गराउने पनि भएकोले यो पर्व बिज्ञान सम्मत मान्न सकिने भौतिकवादी नेता देवेन्द्र श्रेष्ठ बताउँछन् । जाडोमा शरीरलाई चिसोबाट बचाउन पिँडालु उसिनेर खानपर्ने सन्देश यो पर्वले दिएको उनको भनाइ छ ।
विशेषगरी नेवा: समुदायले मनाउने यो पर्वको मूख्य आकर्षण भनेको अन्नको सम्मान गर्दै यसैको प्रयोग गरी बनाइने देवता र देवस्थल हो । नजिकको ईष्ट देवीदेवताको मन्दिर अगाडी नसाबजी (मकै, भटमास, पिँडालु, गहुँलगायतका अन्नको समिश्रण) बाट सोही मन्दिरमा रहेका देवी देवता र मन्दिरको आकृति बनाउनु यस पर्वको विशेषताको रुपमा रहेको छ ।
शुक्रबार भक्तपुरका प्राय सबै मन्दिर अगाडी स्थानीयले श्रद्ध भक्तिपूर्वक नसाबजी बाट देवीदेवता बनाएर प्रदर्शन गर्नुकासाथै र भजन किर्तन सकिएपछि त्यही नसाबजी लाई प्रसादको रुपमा ग्रहण गरेका छन् । नेवा: समुदायले कोजाग्रत पूर्णिमाको दिनदेखि शुरु गरेको एकमहिने रात्रिकालीन दाफा भजनकीर्तन पनि यसै दिनमा सम्पन्न गर्ने प्रचलन रहेको छ ।
किसान बाहुल्यता रहेको भक्तपुरमा अन्नलाई ईश्वरकै दर्जामा सम्मान दिएर देवीदेवता बनाउनु श्रमप्रतिको सम्मान पनि भएको नेमकिपाका स्थानीय नेताहरु बताउँछन् । मौलिक पहिचान पस्कने यो पर्वलाई पर्यटन प्रवर्द्धनमा पनि प्रयोग गर्नसक्नुपर्ने चाँगुनारायण उद्योग बाणिज्य संघका अध्यक्ष एवं श्रद्धालु श्रीभक्त कासिछ्वा बताउँछन् ।